ल्हाः मदुपिनि ल्हाः
मधु श्रेष्ठ
मनू जुयाः जन्म कायेधुसेंलि सुखया नापनापं दुःख नं वया हे च्वनी । थ्व ला प्रकृतिया छगू नियम हे धाःसां छुं मपाः । झीत छुं समस्या वल धाःसा वहे दकलय् तःधंगु समस्या थें च्वनी । तर गुलिखे मनूतय्त धाःसा अज्याःगु समस्या जन्मजात हे वयाच्वंगु दयेफु । गथे कि बुसांनिसें हे ल्हाःतुति मदइगु, मिखां मखनीगु, न्हाय्पनं मताइगु, न्ववाये मफइगु आदि आदि ।
थज्याःगु शारीरिक समस्या दइगु धइगु छुं नं कथं सुखया खँ ला अवश्य नं मखु । थ्व दुःखया हे खँ खः । तर थज्याःगु दुःखय् लानाच्वंपिं लागिं नं छगू सुखया खँ खः, कि शरीरय् खास यानाः ल्हाः मदुपिं मस्तय् लागिं कृत्रिम ल्हाः जडान याना बीगु छगू संस्था नं नेपालय् सक्रिय जुयाच्वंगु दु ।
मनूया शरीरय् ल्हाःया गुलि महत्व दु धइगु खँ कनेमाःगु मखु । थःगु निजी ज्या यायेगुनिसें कयाः आत्मसुरक्षाया ज्याय् तकं ल्हाःया भूमिका दयाच्वनी । शरीरया लागिं ल्हाः अतिकं महत्वपूर्ण अंग खः । ल्हाः मंत धाःसा जीवन न्ह्याकेत नं सहज जुइ मखु । थज्याःगु खँयात मनन यासें अथे ल्हाः मदुपिं मनूत, उकिसनं विशेष यानाः मस्तय्गु लागिं निःशुल्क हे कृत्रिम ल्हाः तया बीगु लागिं छगू संस्था अस्तित्वय् वःगु दु, उकिया नां खः इनेबल नेपाल ।
ल्हाः मदुपिं मस्तय्त कृत्रिम ल्हाः छुना बीगु – थ्व छगू झीगु लागिं न्हूगु हे सेवा खः । थनिं दत्या न्ह्यः पलिस्था जूगु इनेबल नेपालं देशय् थ्व सेवा शुरु याःगु खः । येँया सिनामंगलस्थित नोबल अस्पतालय् थुकिया ज्याकू दु । थ्वं थःगु सेवा नं अनं हे बी । ल्हाः मदुगु कारणं मस्तय्त ब्वनेज्या लगायत छुं नं ज्याय् समस्या मवयेफु व अझ विशेष यानाः ल्हाः मदु धकाः हिनतावोध मजुइमा धकाः इनेबल नेपालं थ्व सेवा शुरु याःगु खः ।
समाजसेवाय् समर्पित ९ म्ह मनूत मिले जुयाः पलिस्था याःगु थ्व संस्थाय् थौंकन्हय् मेपिं स्वम्ह प्राविधिकत नं थपे जूगु दु । थुकिया संस्थापक अध्यक्ष धाःसा नारायणप्रसाद कोइराला खः । वंगु दछिया दुने थ्व संस्थां स्वीच्याम्ह मस्तय्त ल्हाः छुनाबीधुंकूगु दु । संस्थाया प्रशासकीय प्रमुख दिनेश राजभण्डारीया कथं अज्याःगु कृत्रिम ल्हाः तयेगु लागिं स्वनिगः दुनें स्वयां नं स्वनिगलं पिनेयापिं मनूत यक्व वयेगु यानाच्वंगु दु ।
स्वनिगः पिनें वइपिं गरिब व असहाय मस्तय् लागिं संस्थां निःशुल्क ल्हाः जडान याना बीगु जक मखु, उमित येँय् वये वनेगु यातायात खर्च समेत बीगु जुयाच्वन । थनं जडान याना बीगु कृत्रिम ल्हातं छगू लिटर ति लः दुगु बोटल ल्ह्वने फइगु, किताब दुगु झोला ज्वने फइगु, बल म्हिते फइगु नापं साइकल तकं गये फइगु खँ नं भाजु राजभण्डारीं कनादिल ।
भचा अभ्यास यायां वन धाःसा थ्वहे ल्हातं लः त्वनेगु, नयेगु ज्या तकं याये फइ । तर मस्त चकचक नं जुइगु जुयाः गनं हात धाःसा थ्व ल्हाः त्वःधुले नं फु । त्वःधुल धाःसा उकिया मर्मत नं याये फइगु जुयाच्वन । गामय् अप्वः धइथें मस्त सिमा गइबलय् कुतुं वयाः ल्हाः ध्यने मालीगु अवस्थाय् थ्यनाच्वनी ।
ल्हाः मदुगु कारणं मस्तय्त ब्वनेज्या लगायत छुं नं ज्याय् समस्या वयेफु व अझ विशेष यानाः ल्हाः मदु धकाः हिनतावोध मजुइमा ल्हाः छुनाबीगु सेवा सुरु जूगु खः
गुलिं मस्तय् बुसांनिसें हे ल्हाः मदुगु नं जुयाच्वनेफु । येँय् दछि न्ह्यः भुतुमालि लाः वंबलय् हाइ भोल्टेज तारया करेन्टं ज्वनाः ल्हाः हे ध्यने माःगु अवस्था नं जूगु दु । अज्याःपिं मस्तय्त कृत्रिम ल्हाः तयेगु ज्या नं थ्व संस्थां यानाच्वंगु दु । अथे ल्हाः जोडे याना वंपिं मस्तय्त ल्हातं ज्या यायेगु स्वयां नं अप्वः उमिगु आत्मबल व आत्मसम्मान यक्व हे थकया बीगु अनुभव नं संस्थायात जूगु दु ।
दकलय् लसताया खँ ला लँय् सुं पासा नापलात धाःसा उमिसं याउँक ल्हाः न्ह्यःने यंकाः ह्याण्डशेक तकं याये फइ । कृत्रिम ल्हाः छपा दयेवं उमिसं थःगु लं थःपिंसं तुं फीगु, थःगु ज्या थःपिंसं तुं यायेगु याये फइ । हाः मदुपिं मस्तय्त थथे कृत्रिम ल्हाः तयाः सेवा बीगु बिचाः गनं वल ले धइगु विषयय् भाजु दिनेशं कनादी, ‘नोबेल अस्पताल, नोबेल कलेज आदि नोबेल ग्रुपया हे अध्यक्ष सुरेन्द्र श्रेष्ठ खंकादिल ।
थुकिं प्रभावित जुयाः वय्कलं नेपालय् नं थज्याःगु सेवा बी दःसा जी धकाः अन कुतः यानादिल । क्यानाडाय् वय्कःया थः लाःम्ह छम्ह नेपाःमि दु, भाजु ऋषि श्रेष्ठ । ऋषि श्रेष्ठ एनआरएन नं खः । थुकिया लागिं वय्कलं यक्व हे कुतः यानादिल । फलस्वरुप कृत्रिम ल्हाः दयेकेत माःगु सामान नेपाः छ्वया हल । नापं क्यानाडाय् च्वंपिंसं तालिम नं बीगु यात । थ्वयां लिपा संस्था सुचारु जुया वन ।’
क्यानाडाय् जोन स्कूलं सन् २०१३ य् शुरु यानादीगु छगू स्वयम्सेवी संस्थां थ्व ज्या यानाच्वंगु खः । इनेबल नेपाल नं आः थ्व संस्थाया छगू दुजः जुइधुंकूगु दु । थ्व संस्थां विश्वया ८० गू देशय् थथे ल्हाः जडान यायेगु सेवा बिया वयाच्वंगु दु ।थ्व संस्थां थथे सेवा बी फयाच्वंगुया मू कारण चन्दा व ग्वाहालिपाखें हे खः ।
संस्था चले यायेत नं आः तक नोबल अस्पतालं माःगु थाय् बियाः अन जुइगु विजुली, एसी, लः आदिया खर्च नं व्यहोरे यानाच्वंगु दु । लिसें थ्व ज्याया लागिं थीथी बैंक लगायतया संस्थातय्सं नं ग्वाहालि यानाच्वंगु दु । कृत्रिम ल्हाः तयेगु थ्व विधियात थ्री–डी प्रिन्टिङ धायेगु याः । थ्व विधिपाखें छपा ल्हाः दयेकेगु लागिं २४ निसें ४८ घन्टा तक ई काः ।
मस्तय्सं थःत छु रंगया ल्हाः तयेगु धकाः छनौट यायेदु । तर ल्हाः दयेकेगु लागिं उमिगु ल्हाः व पतिंया नाप कयाः ज्या यायेमाः । थ्व आःयात गरिब मस्तप्रति केन्द्रित दु । थ्व सेवा सर्लाही, वीरगंज, पोखरा, बाग्लुङ, संखुवासभा, बुटवल व चितवनया मस्तय्सं कायेधुंकूगु दु । थ्व सेवायात अझ विस्तार यायेगु लागिं संस्थां स्थानीय सरकार मार्फत उगु क्षेत्रय् च्वंपिं अपांगता दुपिं मनूतय्गु धलः नं माग यानाच्वंगु दु ।
ल्हाः मदयेकाः च्वनेमाःपिं अपांगता दुपिं मस्त गन गुलि दु धइगु सी दत धाःसा इनेबल नेपाल थः हे अन वनाः सेवा बीगु नं ग्वसाः दु ।थ्व कृत्रिम ल्हाः झी थःगु हे ल्हाः दुपिं मनूतय् लागिं ला छुं तःधंगु खँ थें च्वनी मखु ।
तर ल्हाः मदयेकाः च्वनेमाःपिं मनूतय् लागिं धाःसा थ्व छगू तःधंगु हे उपलब्धी जुइ । झीत न्ह्यागु नं वस्तुया महत्व अबले जक तःधं थें जुइ जब व वस्तु झीपाखें गुमे जुइ । थ्व ल्हाः नं अथे खः । चीमिपिनि मानवीय सेवाय् इनेबल नेपालं यानाच्वंगु ज्या अथे ल्हाः मदुपिनि लागिं द्यःया वरदान थें जुयाच्वंगु दु ।
LEAVE YOUR COMMENTS