मंकाः खलःया नामं नकली ज्या

येँ – नेपाल–भाषा मंकाः खलःया नामं छुं मनूतय्सं ज्याझ्वः याना जूगु खँयात नेपालभाषा मंकाः खलकं आपत्ति प्वंकूगु दु । नेपाल–भाषा मंकाः खलःया नायः जनकवि दुर्गालाल श्रेष्ठं थन छगू वक्तव्य पिकासें निम्ह प्यम्ह नेवाः बौद्धिक ख्यःया मनूत सःताः अज्याःगु ज्या याना जूगु खँय् थःपिनि ध्यानाकर्षण जूगु खँ धाःगु दु ।

वक्तव्यय् थनिं पीछदँ न्ह्यः पद्म– रत्न तुलाधरया अध्यक्षताय् गठन जूगु नेपालभाषा मंकाः खलःयात हानं निरन्तरता बीत जनकवि दुर्गालाल श्रेष्ठया अध्यक्षताय् आधिकारिक कथं दर्ता जूगु व उकी न्वकु मल्ल के. सुन्दर, छ्यांज्ये राजा शाक्य, दांभरि गणेश साय्मि लिसें दुजलय् किरण श्रेष्ठ, डा. चुन्दा वज्राचार्य, मंगला कारंजित, प्रविणलाल श्रेष्ठ व सुजन तुलाधर च्वनादीगु धयातःगु दु ।

थ्व बाहेक मंकाः खलकय् मेपिं सुं दुजः मदुगु व थज्याःगु अवस्थाय् सुं मनुखं थःत छ्यांज्ये वा मेगु छुं पदाधिकारी धकाः न्ह्यथनाः मंकाः खलःया लेटरप्याड छ्यलाः गुगुं नं गतिविधि यायेगु अनाधिकारपूर्ण व कानूनतः दण्डनीय ज्या खः धकाः नं धयातःगु दु ।

थज्याःगु ज्या सुनानं मयायेत व यात धाःसा उकिया विरुद्ध कानुनी पलाः न्ह्याके मालीगु खँ नं वक्तव्यय् स्पष्ट यानातःगु दु । लिसें अनावश्यक भ्रमय् सुं तमक्यनेत नं मंकाः खलकं इनाप याःगु दु ।

सम्बन्धित बुखँ

LEAVE YOUR COMMENTS