
येँ – प्रेस काउन्सिल नेपालया न्यय्दँ वार्षिकोत्सव (स्वर्ण जयन्ती)या लसताय् लाकाः थीथी पुरस्कार लःल्हाःगु दु । म्हिगः जूगु छगू विशेष समारोहय् थ्व पुरस्कार लःल्हाःगु खः । काउन्सिलं बीगु दकलय् तःधंगु छगू लाख ५१ हजार तकाया गोपालदास पत्रकारिता सिरपाः गोविन्दबहादुर थापायात बिउगु दु ।
अथेहे छगू लाख न्याद्वः तकाया सुरेन्द्रबहादुर बस्नेत सिरपाः डा. सुरेश आचार्ययात लःल्हात । न्यय्द्वः तकाया आचारसंहिता सिरपाः दैनिक नेपालगञ्ज बाँकेयात लाःगु दुसा २० हजार तकाया भाषागत पत्रकारिता सिरपाः सुनसरीया मो. हसन मियाँयात लःलहात । अथेहे साहित्यिक पत्रकारिता सिरपाः अन्तर्बोध साहित्यिक त्रैमासिकयात लःल्हाःगु दु ।
प्रेस काउन्सिल क्रियाशील पत्रकारिता सिरपाः नेपालभूषण न्यौपाने, शिवबहादुर कार्की, सितारामप्रसाद बर्मा कट्टेल, यज्ञप्रसाद शर्मा, हरि जोशी, बालकृष्ण प्रसाद, शंकर कार्की, विष्णुप्रसाद शर्मा, विश्वमणि सुवेदीयात लःल्हात । थ्व सिरपाः म्हतिं २० हजार तकाया खः । अथेहे प्रेस काउन्सिल युवा पत्रकारिता सिरपाः मीना तिवारी, अजयदीप शर्मा, अमर खड्का, डिलाराम आचार्य, विधान श्रेष्ठ, करुण अयाृल, निलिफा सुब्बा, मन्जिमा ढकाल, सोमबहादुर थापा, रिङ्कु मिश्रयात लःल्हाःगु दु ।
थ्व सिरपाः म्हतिं झिंन्याद्वः तकाया खः । काउन्सिलया बुन्हिया झ्वलय् काउन्सिलया वर्ष कर्मचारीतय्त नं सिरपाः बिउगु खः । थुकी सबिता बानियाँ व हर्कबहादुर श्रेष्ठयात नीद्वः नीद्वः तकाया सिरपाः लःल्हाःगु खः । अथेहे काउन्सिल कर्मचारी प्रोत्साहन सिरपाः विपुल पाण्डेयात लःल्हात ।
LEAVE YOUR COMMENTS