ने. सं. ११४६ बछलागा तृतीया -

गुथि विधेयक विरुद्ध २० गते ऐक्यवद्धता सभा

येँ -विवादास्पद गुथि विधेयक विरुद्ध सरकारयात खबरदारी यायेगु लागिं आः थ्वहे वइगु असार २० गते थीथी आदिवासी जनजाति न्ह्यलुवातय्सं सम्बोधन याइ कथं ऐक्यवद्धता सभा याइगु जूगु दु । येँया बसन्तपुली महाद्यःपार्वती देगः क्वय् उगु सभा यायेगु ज्याझ्वः क्वःछिनातःगु दु ।

ज्याझ्वलय् आदिवासी जनजाति महासंघंनिसें कयाः नेवाःतलिसे ताः ई न्ह्यवंनिसें नापनापं च्वनाः संघर्ष याना वयाच्वंगु थीथी आदिवासी जनजाति, मधेसी समुदायया प्रतिनिधितय्सं सम्बोधन याइगु खँ धाःगु दु । उकी तामाङ, मगः, थारू, गुरुङ, राई, लिम्बू लिसें मधेसी समुदायपाखें नं सम्बोधन याइगु खँ सीदुगु दु ।

गुथि विधेयक विरुद्ध एकीकृत आन्दोलनया ग्वसालय् उगु ज्याझ्वः जुइत्यंगु खः । उगु आन्दोलनपाखें गुथि विधेयकयात कयाः म्हीग येँनं छगू खबरदारी मोटरसाइकल ¥याली पिकयाः स्वनिगः चाःहिलेगु ज्या याःगु खः । येँ, यल, थिमि, ख्वप चाःहिलाः किपुली थ्यंकाः छगू सभाय् हिउगु खः ।