नेपालभाषा चीहाः संकिपा कासाय् झिंखुगू संकिपा दुतिन
येँ – नेपालभाषा चीहाः संकिपा कासा–११३९ या निंतिं मुक्कं झिंखुगू संकिपा दुहां वःगु दु । थगुने जूगु न्हापांगु कासाय् झिगू संकिपा दुहां वःगु खः । निक्वःगु नेपालभाषा चीहाः संकिपा कासाया निंतिं दुहां वःगु संकिपाय् पसः, म्यूजिष्म, ग्वाय् पियाः सुखूध्यां, इन्द्रायणी, मतिना, बैना भ्वं, घात, लसता, लिचिउगु स्वचेतना, नसा, ध्वः छध्वः रेखां किउगु, ह्याँउगु हि, आस्था, घःचाः, स्वार्थ व कुमति खः ।
थगुनेया कासाय् मांभाय्यात प्राथमिकता बियातःगु खःसा थुगुसी छुं नं सपूm, पत्रपत्रिका वा सामाजिक संजालय् पिहां वःगु साहित्यया लिधंसाय् संकिपा दयेकेमाःगु नियम दुगु खः । लिसें अज्याःगु साहित्य पिदंगु खः धइगुया दसिकथं प्रकाशन जूगु प्रति व उकिया फोटोकपि नं दुथ्याकेमाःगु व्यवस्था यानातःगु खः ।
म्होतिं न्यागूनिसें अप्वलय् नीगू मिनेटया दुने संकिपा तयार यायेमाःगु नियम दुसा संकिपाया निर्माणया प्राविधिक पक्षय् नं छुं छुं खँयात ध्यानय् तयाः दयेकेमाःगु नियम दुगु खः । अथे हे संकिपाय् अंग्रेजी सब टाइटल नं अनिवार्यकथं दुथ्याकेमाःगु व्यवस्था यानातःगु दुसा संकिपाय् दुथ्याःगु संवादयात स्टुडियोय् हे डबिंग यानातःगु जुइमाःगु नं व्यवस्था यानातःगु दु ।
कासाय् न्हाप, लिउ व लियांलिउ लाःगु संकिपायात छसिकथं न्हय्न्याद्वः, न्यय्द्वः व नीन्याद्वः तका दां सिरपाः बीगु जूगु दुसा लियांलिउ सिरपाः निगू संकिपायात बीगु ग्वसाः खलकं जानकारी बिउगु दु ।
LEAVE YOUR COMMENTS