सुभाय् निसें न्ह्यःने वःम्ह सबिन शाक्य

अबु वीरमान शाक्य व मां धर्मदेवी शाक्यया गुम्ह काय् मध्ये साहिलाम्ह काय् खः सबिन शाक्य । तर गुम्ह मध्ये न्याम्ह ला मचाबलय् हे मंत । आः प्यम्हजक ल्यंदनि । प्यम्ह मध्ये दाजु सुरेन्द्रमान शाक्य व किजा गेहेन्द्रमान शाक्य खः । भाजु सुरेन्द्रमान शाक्यया ख्वाः सबिनलिसे तसकं ज्वःलाः । गुलि ला दापा हे जू हँ ! गुलि ला सुरेन्द्रयात हे सबिन धकाः च्वनिपिं नं दु हँ !

दाजुकिजा यक्वः दुसां उमि दथुइ ल्वापु मदु । वहे तःधंगु खँ खः । येँया ङतय् जन्म जूपिं थुपिं दाजुकिजा खय्त ला थःथःगु अलग अलग छेँय् च्वनीगु खः । तर अय्सांतबि नं उमिगु पारिवारीक स्वापू धाःसा त्वःमफिउनि । उलिजक मखसे उपिं मिले जुयाः हे ज्या याना वयाच्वंगु नं दनि । वंगु असार महिनाय् पीगुदँ फुनाः न्यय्दँ क्यंम्ह सबिनया औपचारिक नां रबिन्द्रमान शाक्य जुयाच्वन ।

लिपा वनाः तिनि वयागु नां सबिन जूवंगु खः । ङतय् उमि न्हापा घडी पसः । अथे जुयाः सबिन नं घडी दयेके सः, रेडियो दयेके सः । ङत त्वालं फसिकेबय् च्वंगु रञ्जना हल धइगु उलि तापाः मजू । अले सबिनं प्यंगू तगिंतक ब्वंगु रक्तकाली त्यंगःया भक्त विद्याश्रम जुइमा वा प्यंगू तगिं धुंकाः ब्वंगु थँहितिया शान्तिशिक्षा मन्दिर चाहे थःमजुइमा अनंनिसें रञ्जना हल तक वनेगु धइगु तापागु खँ मखु ।

अले उगु इलय् मनोरञ्जनया हलंज्वलं धइगु नं मेमेगु उलि मदुनिगु ई जूगुलिं प्याखं हे स्वयेगु चलन । वहे चलन सबिनं नालाकाल । राजेश खन्ना, शम्मी कपुर, शशी कपुर थेंज्याःपिं बलिउड हिरोतय्गु संकिपा स्वस्वं व तःधिकः जुल । “संकिपा स्वयाः वयेबलय् जितः जि थः हे व फिलिमया पात्र थें च्वनिगु धयां । छेँय् वया फिलिमय् गथे गथे यात, जिं नं अथे अथे हे यानाः स्वयेगु ।”

सबिनयात स्वर सम्राट नारायण गोपाल सीबलय् सनां वंपिं मनूतय्गु भीड खनाः थः तसकं प्रभावित याःगु जुयाच्वन । कलाकार धइपिं गुलि लोकंह्वाः धयागु थुइवं व थः नं छम्ह कलाकार जुइगु मति तःगु जुयाच्वन ।

अभिनय प्रति गथे नुगः क्वसात धइगु न्ह्यसलय् सबिनं थथे लिसः बिल । “वास्तवय् जितः अभिनयसिबें अप्वः ला म्ये हाले हे यः । न्हापा पसलय् च्वनेबलय् रेडियो नेपाल साप हे न्यनेगु । विशेष यानाः न्हिनसिया छता ई धुंका हायेका हइगु आधुनिक म्ये ला साप हे यः । रेडियोय् म्ये वइबलय् नापनापं हाला च्वनेगु, अले जिं दकलय् न्हापां दबुलिइ न्ह्यःब्वयागु प्रतिभा धइगु नं म्ये हे खः ।

२०४० साल पाखे हे जिं दबुलिइ म्ये हाले धुन” सबिनं कन । सबिनयात स्वर सम्राट नारायण गोपाल सीबलय् सनां वंपिं मनूतय्गु भीड खनाः थः तसकं प्रभावित याःगु जुयाच्वन । कलाकार धइपिं गुलि लोकंह्वाः धयागु थुइवं व थः नं छम्ह कलाकार जुइगु मति तःगु जुयाच्वन । तर थःम्हेसिनं धाःसा कलाख्यःया सुं नं मनूत म्हमसिउ । उकिं उखेपाखे गथे यानाः पलाः न्ह्याकेगु धकाः नं मसिउ ।

“लिपा जिमिसं पसः ङतं ल्ह्यया गल्कोपाखाय् तये यंका । अनचाहिं नांजाम्ह कलाकार सन्तोष पन्तं दयेकूगु ‘हिजो आजका कुरा’ नांयागु छगू टेलिफिल्मय् म्हितिपिं कलाकारत च्वनाच्वंगुु जुयाच्वन” कला क्षेत्रय् थःगु न्हापांगु पलाःयात लुमंकुसे सबिनं कन । अन उपिं लिसे संगत बढे जुया वःबलय् वं नं थःगु इच्छा उमित कन ।

उपिं मध्ये प्रफुल्ल नरसिहं राणा नांयाम्ह छम्हेसिनं सबिनयात “हिजो आजको कुरा”या डाइरेक्टर नेपाःया नांजाम्ह ख्यालिन्हिलि कलाकार सन्तोष पन्तया थाय् यंका बिल । उगु ईलय् थन नेपाल टेलिभिजन छगूयां छगू जक टि.भी. च्यानल खः । उकिसनं “हिजो आजका कुरा” साप हे लोकंह्वाःगु सिरियल खः । अले उगु इलय् सोमबार पतिकं न्हू न्हूपिं कलाकारत ल्ययेया निंतिं ल्यज्या जुइगु जुयाच्वन ।

छगू सोमबार सबिन शाक्य नं व ल्यज्याया निंतिं अन मूंवंपिं न्यय्म्ह–खुइम्ह कलाकारतय्गु लाइनय् दँ वन । अडिसन बिल । पास नं जुल । अले वयात “हिजो आजका कुरा” य् विद्यार्थीया छगू रोल बिल । रोल ताःलात । अनं निसें सन्तोष पन्त व सबिन शाक्यया स्वापू झनझन क्वातुया वन । आःतक क्वातुया च्वंगु हे दनि । “सन्तोष पन्त धइम्ह थ्व लाइनया जिम्ह गुरु खः ।

वास्तवय् सन्तोष पन्त नापलाय् सिबें न्हापा हे जिं हरिहर शर्मालिसे अभिनयया तालिम काये धुनागु खः । तर सन्तोष पन्त नापलाये धुंकाः जिं अभिनयया व्यावहारिक ज्ञान सयेका कया । वय्कलं हे जितः थौं थनतक थ्यंनेत तिबः बियादीगु खः” सन्तोष पन्तलिसे नापलाये धुंकाः तिनि थःगु कलायात्रा न्ह्याःगु खँयात कया सबिनं थथे धाल ।

सन्तोष पन्तयात गुरु थापना यानातःम्ह सबिनं दँय्दँसं गुरुपुन्हि कुन्हु वयागु छेँय् वनाः गुरुपुजा याःवनेगु यानाच्वंगु दु । उगु इलय् “हिजो आजका कुरा”य् दकलय् न्हापांखुसी अभिनय याःम्ह सबिन शाक्य लिपा वना थःगु बिस्कं पहवःगु अभिनय शैलीया हुनि छम्ह लोकंह्वाम्ह व नांजाःम्ह कलाकारया रुपय् न्ह्यःने वलसा लिपांगु ईलय् “हिजो आजका कुरा”या न्हूगु भर्सन ला वयागु हे म्यानेजमेण्टय् तयार जुल ।

न्हूगु भर्सन कान्तिपुर टेलिभिजनय् पिदंगु खःसा ११७ ब्वःतक क्यंगु खः । कान्तिपुर टि.भी.इ क्यंगु थ्व न्हूगु भर्सनया च्वमि व सह–निर्देशक आर्यम नकःमि खः । आर्यम नकःमि व सबिन शाक्यया जोडी धइगु नेपालभाषाया संकिपा ख्यलय् छगू तसकं लोकंह्वाःगु जोडीया रुपय् कयातःगु दु । सबिन शाक्यया पलाः नेवाः संकिपापाखे गथे न्ह्यात अले आर्यमलिसे वयागु स्वापु गथे दतले ?

थ्व न्ह्यःसःया लिसः बीगु झ्वलय् सबिनं धाल, “जि छम्ह पासा दु । वयागु नां लक्ष्मी नकर्मी । अभिनयप्रति जिगु क्वसागु नुगः खना लक्ष्मीं जित आर्यमलिसे नापलाके यंकल । आर्यमजु ला लक्ष्मीया दाजु धकाः जुयाच्वन । आर्यमजु उगु इलय् ‘मिखा दुम्ह कां’ नांयागु छगू नेवाः टेलिप्याखं दयेका च्वंगु । जिं आर्यमजुयात उगु संकिपाया इलय् फुथेंचाथें ग्वाहालि याना ।

जिमिगु मन मिले जुल । तर दुर्भाग्यया खँ छु धाःसां उगु फिलिम पूमवन । यक्वः लिपा आर्यमजुं ‘मिखा दुम्ह कां’ हाकनं न्हू कथं दयेकादिल । वहे झ्वलय् आर्यमजुं ‘सुभाय्’या बाखं न्यंका दिल । जित यःताल । अले जिपिं मिले जुयाः ‘सुभाय्’ दयेका । ‘सुभाय्’ टेलिभिजनय् क्यनेगु बिचाः यानागु खः । तर बिचाः यानाथें ज्या मजुल । अले जिमिसं च्यारिटी शो क्यना ।

‘सुभाय्’ नांयागु उगु नेवाः संकिपा तसकं लोकंह्वात । तर दुःखया खँ छु धाःसा ‘सुभाय्’ या चक्का लिक जुल । यक्वसिनं कपि दयेका स्वल । डुप्लिकेट दयेका स्वल । स्वयेत ला यक्वसिनं स्वल । जिपिं लोकं नं ह्वात तर दां लबः धाःसा नये मखन । न्ह्यागु जूसां आपासिनं स्वयादिल, व नं चानचुन खँ मखु ।”

थुकथं आर्यम व सबिन नापं नापं न्ह्याकूगु पलाखय् लिपा वना न्याल्लब्यां, पपु मदुम्ह झंगः लगायत छुं नेवाः फिल्म पिदन । “फिल्म उकिसनं नेवाः फिल्मय् जक लगे जुयां थाकुइगु मति लुया वःबलय् सबिनं छुं ई तक फिल्म ख्यलं दिपा कायेगु उहः काल । छेँय् छखा न्ह्याथे यानासां दनेगु मति तया ब्यापारय् लगे जुल । प्यदँ न्यादँति छुं नं कथंया कलाकारिताया गतिविधिइ ब्वति नं मकाल ।

मनूतसें धाःसा आर्यम व सबिन दथुइ बाय्भु वल धकाः नं बय्बय् यात । “वास्तवय् आर्यमजुलिसे बायागु मखु । संकिपा व कलाकारिता ख्यलं हे दिपा कयागु खः । जिं मति तयाथें हे छेँय् छखा दयेका । बिजनेस ताःलाका । अले हाकनं थ्व ख्यलय् वया । सकसिनं खँ हे खँ जुइमा व धुंकाः “न्हूदँ” संकिपाय् नं म्हिता । अले “ड्याड सन” नांयागु नेवाः सिरियल नं आर्यमजु लिसे जाना दयेका ।

आर्यम व सबिन दथुइ ब्वलन धाःगु बाय्भूला फय्गं जक खः धकाः पुष्टि यात धकाः सबिनं धाल । थौंकन्हय् नेपालमण्डल टेलिभिजनय् “ड्याड सन एण्ड मम् ” य् नं म्हिता च्वंगु दु । प्यदँ न्यादँ तक काःगु दिपा लिपा सबिनं म्हितूगु दकले न्हापांगु संकिपा “बांलाः मय्जु” खःसा वयां लिपा “थः कतः कतः थः”, “तानाज्यः” थेंज्यागु संकिपा नं म्हिते धुंकुल ।

थ्वहे ख्यलय् छुं यायेगु धकाः ताःतुना सबिनं आर्यम व पासापिंलिसे जाना मुभि एण्ड मोर नांयागु छगू कम्पनी नं नीस्वंगु दुसा वहे कम्पनीपाखें संकिपात दयेकेगु याना च्वंगु दु ।