
बलिउडया चर्चा जुइबलय् विशेष यानाः अनया स्टारतय्सं कमे याइगु दांयात कयाः अप्वः चर्चा जुइगु याः । थौंकन्हय् बलिउडय् अप्वः दां कमे याइपिं स्टारत आपालं दु । तर छगू इलय् बलिउडया नांजाःपिं स्टारत लिपा वनाः नयेमखनाः सिनावंपिं नं दु । अज्याःपिं स्टारत मध्ये प्रदीप कुमार, भगवान, कूकू, भारत भूषण थेंज्याःपिं स्टारतय्गु नां न्ह्यःने लाःवः । उमिसं थः लोकंह्वानाच्वंगु इलय् कमे याःगु दां दक्व मोजमस्ती यानाः फुकाछ्वत । अले उमेर वने धुंकाः नयेत्वने तकं मखंका च्वनेमाल ।
छगू जमानाय् साप हे लोकंह्वाःपिं थुपिं कलाकारत लिपा वनाः नये मखनाः वाथावाथा कंगु खनाः वयां लिपाया स्टारत देव आनन्द, राज कपुर, सुनिल दत्त, मनोज कुमार थेंज्याःपिं स्टारतय्सं थःपिसं फिल्मं कमेयानागु दां उद्योग धन्दाय् लगे यात । राजेश खन्ना, शशी कपुर, जीतेन्द्र, अमिताभ बच्चन थेंज्याःपिं लिपाया पुस्ताया स्टारतय्सं नं अथे हे यात । आः ला आपालं आपाः स्टारतय्सं थःगु कमाइयात उद्योगधन्दाय् लगे यानाच्वंगु दु । तर बलिउडय् अज्याःपिं स्टारत नं दुु, गुम्हेसिनं छगू इलय् थःत टाटपल्टे जुल धकाः तकं घोषणा यायेमाल ।
अमिताभ बच्चन
अज्याःपिं स्टार मध्ये बलिउडया साप हे नांजाःम्ह स्टार अमिताभ बच्चन तकं ला । सन् २००० पाखेया खँ खः । उगु ईयात बलिउडया मेगास्टार धयातःम्ह अमिताभ बच्चन नं बाम्हय् काःगु ई कथं कयातःगु दु । थः ल्याय्म्ह नं मखये धुंकूगु अले बुरा नं मजूनिगु ई जुयाच्वंगुलिं उगु इलय् थःत तसकं थाकुगु खँ अमिताभ बच्चनं इलय्ब्यलय् कनेगु याः । छखे थः हिरो जुयाः म्हितूगु मृत्युदाता, कोहराम, आजका अर्जुन थेंज्याःगु फिल्म फ्लप जुलसा मेखे अमिताभ बच्चनं चायेकूगु कम्पनी एबिसिएलं याःगु ज्या नं तालय् मलाःबलय् आपालं द्याका च्वनेमाल । थुकिं यानाः अमिताभ बच्चनयात आर्थिक रुपं समस्या वल । थज्याःगु समस्यालिसे ल्वानाच्वंगु इलय् वयात ‘कौन बनेगा करोडपति’ नांयागु टिभि प्रोग्रामं तःधंगु तिबः बिल । उगु प्रोग्रामयात स्पोन्सर याःगु कम्पनी डाबरपाखें नं तःधंगु तिबः बिल । अले तिनि अमिताभ बच्चनयात हाकनं सासः ल्हाये अःपुका बिल ।
प्रिटी जिन्टा
थथे टाटपल्टे जूगु अवस्थाय् थ्यंम्ह मेम्ह बलिउड स्टार प्रिटी जिन्टा खः । सोल्जर, हर दिल जो प्यार करेगा, चोरी चोरी चुपके चुपके थेंज्याःगु आपालं हिट फिल्म म्हितूम्ह हिरोइन प्रिटी जिन्टा लिपा वनाः प्रियंका चोपडा, करीना कपुर, दिपिका पादुकोणे थेंज्याःपिं न्हून्हूपिं हिरोइनत स्टार जुयावःबलय् थःत उमिगु हुलय् तनावंम्ह थें तायेकल । अले उमि दथुइ हाकनं थःगु न्हाय् धस्वाकेगु मति तयाः छगू फिल्म दयेकल । “इश्क इन् पेरिस” नांया थ्व फिल्म बांमलाक्क फ्लप जुल । थ्व फिल्म फ्लप जूबलय् उगु फिल्मय् ज्या याःपिं गुलिखे मनूतय्गु ध्यबातकं पुले मफुत । थथे प्रिटी जिन्टा टाटपल्टे जूबलय् वयात सलमान खानं तिनि ग्वाहालि यात । सलमान खानया ग्वाहालियात प्रिटी जिन्टां आः तक नं पुले मफुनि धइगु न्यनेदुसा थ्व खँय् प्रितिं नं थःम्हं सलमानया गुणया पलेसा जिन्दगीभर पुलां नं सिधइमखु धायेगु यानाच्वंगु दु ।
शाहरूख खान
थौंकन्हय् किंग स्टार धयातःम्ह शाहरूख खान नं छक्वः टाटपल्टे जूगु अवस्थाय् थ्यंगु आपाःसिनं मसिउ जुइमा । संसारय् दकलय् धनीम्ह स्टार मध्ये छम्ह कथं कयातःम्ह स्टार खः शाहरूख खान । अय्सां छगू इलय् व नं ध्यबा मदयाः वाथावाथा कंगु खँ पिहां वःगु दु । दिल तो पागल है, दिलवाले दुल्हनिया ले जाएंगे, डर थेंज्याःगु आपालं फिल्म हिट जुयाः स्टार जुइत ताःलाःम्ह हिरो शाहरूख खानं छक्वः छगू फिल्म दयेकीगु कम्पनी नीस्वन । उगु कम्पनीं दयेकूगु छुं छुं फिल्म हिट जुलसा छुं छुं फ्लप जुल । उकी मध्ये दकलय् बांमलाक फ्लप जूगु फिल्म धइगु “ रा. वन ” खः । बीग बजेट फिल्मया रुपय् दयेकूगु फिल्मं स्वकुमिया नुगः त्याकेमफुबलय् वयात तसकं थाकुगु खः । डिष्ट्रिब्युटरतय्के कयातःगु बैना तकं लित बीमफयाः वाथावाथा कंगु खः ।
गोविन्दा
गोविन्दा धइम्ह छगू इलय् आपालं आपाः फिल्म म्हिताः तसकं बय्बय् जूम्ह स्टार खः । लव ८६, इल्जाम, खुदगर्ज, हत्या, स्वर्ग थेंज्याःगु आपालं आपाः हिट फिल्म म्हितूम्ह गोविन्दां लिपा वनाः उलि हिट फिल्म बीमफुत । उकिसनं वं थः दाजु कीर्तिकुमारयात डाईरेक्टरया रुपय् धस्वाकेत दयेकूगु “राधा का संगम” नांयागु फिल्म बांमलाक्क फ्लप जुल । छखे वयागु होम प्रोडक्शनया फिल्म फ्लप जुलसा मेखे बलिउडय् न्हून्हूपिं हिरोत दुहां वःबलय् व तसकं लिउने लाःवन । थथे उखेलाः थुखेलाः मदयाः वाथावाथा कनाच्वंम्ह गोविन्दायात नं वया पासा सलमान खानं “पार्टनर” नांयागु फिल्मय् हिरो दयेकाः म्हितकल । थुकिं यानाः गोविन्दायात अःपुलसा मेमेगु फिल्म म्हितेगु ह्वताः नं चूलाना वल ।
सुभाष घई
बलिउडया नांजाःम्ह फिल्म प्रोड्युसर सुभाष घईं हिरो, कर्मा, विधाता, सौदागर थेंज्याःगु आपालं हिट फिल्म दयेकूगु दुसा वं ह्वीस्लींगवुड नांयागु छगू फिल्म एकेडेमी नं चायेका तःगु दु । वयात बलिउडया शोमाय्न नं धायेगु याः । थुकथं छगू बिस्कं म्हसीका दयेकेत ताःलाःम्ह फिल्ममेकर सुभाष घईं लिपांगु इलय् दयेकूगु यादें, किस्ना, मैं युवराज, ब्ल्याक एण्ड ह्वाइट थेंज्याःगु फिल्म फ्लप जूबलय् आर्थिक रुपं तसकं हे द्याःगु खःसा आः तक नं घईनं मेगु फिल्म दयेकेगु आँट याये मफुनि ।
ज्याकी श्राफ
सुभाष घईया हे “हिरो” फिल्मया लुखां बलिउडय् हिरो जुयाः दुहां वःम्ह हिरो खः ज्याकी श्राफ । ज्याकी श्राफं नं थः लोकंह्वानाच्वंगु इलय् कमे याःगु दांयात उलि क्वातुक्क तयेमफुत । अले छगू इलय् वनाः ध्यबा मदयाः वाथावाथा कंका च्वनेमाल । थ्व सन् २००८ पाखेया खँ खः । उगु इलय् वं थः पासा निर्माता साजिद नादियाडवालायाके तकं दां त्याये काःगु खःसा गुलितकं वं व त्यासा पुलेमफुगु खः । हिरोया रुपय् थःगु डिमाण्ड म्हो जुयावंबलय् थुकथं ध्यबाया अभाव जुइका च्वनेमाःम्ह ज्याकी श्राफयात नं सलमान खानं हे ग्वाहालि याःगु खःसा वयात “क्युँ की” नांयागु फिल्मय् सपोर्टिंग रोल बियाः ग्वाहालि याःगु खः । अनं लिपा ज्याकी श्राफं थःत सपोर्टिंग रोल व नेगेटिभ रोलय् न्ह्यब्वयाः थःगु न्हाय् धस्वाकल । लिपा वया काय टाइगर श्राफ नं हिरो जुयाः लोकंह्वाना वःबलय् तिनि वयात अःपुया वःगु खः ।
राज कपुर
राज कपुरयात भारतया ग्रेटेस्ट शोमाय्न धकाः धयातःगु दु । आपालं आपाः च्वछायेबहगु फिल्म म्हितूम्ह राज कपुरया थःगु फिल्म कम्पनी नं दु । आवारा, आग, बुट पालिस थेंज्यागु आपालं हिट फिल्म दयेकूम्ह राज कपुरं ‘जागते रहो’, ‘जिस देश में गंगा बहते है’ थेंज्याःगु बिस्कं सवाःया फिल्म नं दयेकूगु दु । थज्याःगु फिल्मं वयागु तारीफ ला जुल तर आर्थिक रुपं उलि लबः धाःसा बीमफुत । थथे थःम्हेसिनं बिस्कं सवाःया फिल्म दयेकां नं आर्थिक रुपं द्याका च्वनेमाःबलय् वं थःगु जीवनया हे छगू महत्वपूर्ण फिल्मया रुपय् “मेरा नाम जोकर” दयेकल । भारतया नांजाःपिं कलाकारया नापनापं सोभियत संघया नांजाःपिं कलाकार कयाः दयेकूगु थ्व फिल्म उगु ईया बीग बजेट फिल्म खः ।
थ्व फिल्म दयेकेत राज कपुरं थःगु सर्बे हे पाःगु खः धाइ । थथे सर्बे पानाः दयेकूगु “ मेरा नाम जोकर” या तारीफ धाःसा जुल तर बांमलाक्क फ्लप जुल । थ्व फिल्म फ्लप जूबलय् थःगु छेंबुँ व फिल्म स्टुडियोतकं बह्रः तयाः त्यासा पुलेमाल । थुकथं टाट पल्टे जूम्ह राज कपुरं लिपा थः काय् ऋषि कपुरयात हिरो दयेकाः “बबी” फिल्म दयेकल । थुकी डिम्पल कपाडियाया सेक्सी सिन तयाः न्ह्यब्वल । डिम्पलयात थुकथं न्ह्यब्वःगु खँयात कयाः आलोचना नं जुल तर फिल्म धाःसा सुपर हिट जुल । अले तिनि राज कपुरया सासः थहां वल । थुकथं बलिउडय् आपालं अज्याःपिं स्टार व फिल्ममेकरत दु, गुपिं छगू इलय् बामलाक्क टाटपल्टे जुलसा लिपा बल्लतल्ल तिनि थातं लाके फुगु खः ।
LEAVE YOUR COMMENTS