निक्वःगु निफ महोत्सव तःजिक क्वचाल

निक्वःगु नेपाल अन्तर्राष्ट्रिय चलचित्र महोत्सव (निफ) तःजिक क्वचाल । वंगु विहीवाःनिसें शुरु जूगु न्यान्हुयंकंया महोत्सव सोमवाः क्वचाःगु खः । निगूगु संस्करणया महोत्सवय् विश्वया ३१ गू देय्या ६० गू संकिपाया दथुइ धेंधेंबल्ला जूगु खः ।

निक्वःगु संस्करणया महोत्सवया लिपांगु न्हि महोत्सवय् क्यनेज्या जूगु संकिपामध्ये अन्तर्राष्ट्रिय प्रतिस्पर्धाय् सिंगापुरया ‘ए ल्याण्ड इम्याजिन्डं’ उत्कृष्ट संकिपाया सिरपाः त्याकेत सफल जुल । उगु संकिपायात द्वःछि अमेरिकी डलरलिसें बुद्ध मूर्ति अवार्डकथं लःल्हाःगु खः । अथे हे अन्तर्राष्ट्रिय प्रतिस्पर्धाया चीहाः संकिपापाखे भारतया ‘मीन आलाप’ उत्कृष्ट जुसे ५०० अमेरिकी डलरलिसें माउण्ट एभरेष्ट अवार्ड त्याकेत सफल जुल ।

नेपाली प्रतिस्पर्धाय् ‘डाइंग क्यान्डलं’ उत्कृष्ट संकिपाया रुपय् न्यय्द्वः तका दां व चीहाः संकिपाय् ‘सुपर मंक’यात उत्कृष्ट घोषणा यासें नीन्याद्वः तका दां लःल्हाःगु खः । महोत्सवय् कथानक चलचित्रया उत्कृष्ट निर्देशकया सिरपाः ‘डाइंग क्यान्डल’या नरेशकुमार केसी व उत्कृष्ट पटकथाकारया रुपय् ‘पंचायत’या शिवम् अधिकारीं सिरपाः ल्हातय् लाकेत सफल जुल ।

उत्कृष्ट पुरस्कारया निर्णय यायेत नेपाःया नांजाःम्ह संकिपाकःमि नीर शाहया संयोजकत्वय् छगू निर्णायक समिति गठन यानातःगु खः । समितिइ भारतया नांजाःम्ह संकिपाविद् प्रेमेन्द्र मजुमदार, चीनया बेइजिंग फिल्म एकेदेमिया प्रोफेसर ल्याङ स्याओ व कान्स फिल्म फेस्टिभलया कार्यक्रम निर्देशक एन्ने डेलेच दुजःकथं च्वनादीगु खः ।

सोमवाः क्वचाःगु महोत्सवया समापन समारोहय् मूपाहांकथं झायादीम्ह उपप्रधानलिसें रक्षामन्त्री ईश्वर पोखरेलं पुरस्कृत जुयादीपिंत सिरपाः लःल्हानादीगु खःसा महोत्सव आयोजक समितिया अध्यक्ष केपी पाठकं दां सिरपाः लःल्हानादीगु खः ।

ज्याझ्वलय् नवासें मूपाहां मन्त्री पोखरेलं नेपालय् जुइगु यानाच्वंगु थज्याःगु अन्तर्राष्ट्रियस्तरया संकिपा महोत्सवं नेपाःया संकिपायात नं विश्वव्यापी दयेकेत ग्वाहालि जुइगु जक मखसे नेपालय् अन्तर्राष्ट्रिय संकिपाया बारे ज्ञान बीत नं ग्वाहालि जुइगु विचाः प्वंकादिल ।

उगु हे ज्याझ्वलय् चिबाखं वाचनपाखे सिरपाः त्याकादीपिंत चीहाः संकिपा दयेकेत धासें दिवस अमागाइँया ‘काशिनाथ’ व सजल लोप्चनया ‘गाइड छु फिल्म फेस्टिभल’ नांया निपु बाखंयात रेड कार्पेट प्रा.लि. व नेपाल चलचित्र तथा सांस्कृतिक प्रतिष्ठानं म्हतिं पीद्वः तका अनुदान बीगु घोषणा नं याःगु खः ।

महोत्सवया लिपांगु न्हि सोमवाः नेपालभाषाया निगु चीहाः संकिपा ‘ द मीथ जिरो’ व ‘अस्तित्व’लिसें चीन, लेबनान, टर्की, जापान व बंगलादेशया संकिपालिसें नेपाः व स्पेनया मंकाः निर्माणय् दयेकूगु संकिपा व खय् भाय्या संकिपा नं क्यनेज्या जूगु खः । महोत्सवया हे झ्वलय् थीथी विषययात कयाः समूहगत रुपं बहस यायेगु झ्वलय् लिपांगु न्हि संकिपा व राजनीति विषययात कयाः बहस ज्याझ्वः जूगु खः ।

नेपाःया न्हापांगु संकिपा ‘आमा’या नायिका चैत्यदेवी, नेपाल प्रज्ञा प्रतिष्ठानया प्राज्ञ, सुष्मा राजभण्डारी लगायतया उपस्थिति दुगु समापन समारोहय् आयोजक संस्थाया उपाध्यक्षलिसें संकिपा छनोट समितिया संयोजक विजयरत्न असंबरें लसकुस यानादीगु खः । ज्याझ्वः संस्थाया अध्यक्ष पाठकया सभापतित्वय् जूगु खः ।