फोहर म्हो यायेगु अभियान अन्तर्गत ब्वनेकुथियात डष्टविन

येँ – स्वनिगलय् फोहरया समस्या न्हूगु मखु । फोहरया समस्या ज्यंकेत स्थानीय तहनापं थीथी संघसंस्थां इलय्व्यलय् जनचेतनामूलक अभियान नं संचालन याना वयाच्वंगु दु । थ्व हे झ्वलय् फोहर म्हो यायेगु व म्होति हयेगु ल्याखं थनया जगतसुन्दर ब्वनेकुथियात फोहर वांछ्वयेगु थल (डष्टविन) लःल्हाःगु दु ।

नेवाः एकता अभियानं फोहर म्हो यायेगु अभियान अन्तर्गत ब्वनेकुथियात डष्टविन लःल्हाःगु खः । ब्वनेकुथिया संचालक समितिया दुजः डा. चुन्दा वज्राचार्यया सभापतित्वय् जूगु ज्याझ्वलय् मूपाहां पुलांम्ह रक्षामन्त्रीलिसें प्रतिनिधिसभा सदस्य भीमसेनदास प्रधानं ब्वनेकुथिया ब्वँमिपिंत डष्टविन लःल्हानादीगु खः ।

अभियानया संयोजक कुमुद श्रेष्ठं लसकुस यानादीगु ज्याझ्वलय् अभियानया नायः सुनिलकुमार शाक्यं फोहर गुकथं व्यवस्थापन यायेगु धइगु बारे जानकारी बियादीगु खः । नापं वय्कलं जापानय् गुकथं फोहर व्यवस्थापन यायेगु ज्या जुयाच्वंगु दु धइगु बारे नं जानकारी बियादीगु खः ।

मूपाहां सांसद प्रधानं आः नेवाःत न्हापां स्वयां गाक्कं सचेत जुइमाःगु दु धासें ब्वनेकुथिया ब्वँमिपिं सकसितं मग्यासे न्ह्यःने वयेमाःगु खँय बः बियादिल । सभानायः डा. वज्राचार्यं अःपुक फोहर व्यवस्थापन यायेगु विधि स्यना कायेफुगुलिं आः थुकियात छेँय् छेँय् नं फोहर व्यवस्थापन यानाः फोहरय् म्होति हये फइगु जूगुलिं ज्याझ्वः तसकं बांलाःगु विचाः प्वंकादिल ।

अभियानं ब्वनेकुथियात भ्वं, न व प्लाष्टिकयात ब्वथलाः फोहर मुनेगु निंतिं डष्टविन बिउगु व अज्याःगु फोहरयात मियाः वःगु ध्यबा ब्वनेकुथिया हे मस्तय् निंतिं छ्यलेगु प्रिन्सिपल सुनिता मानन्धरं कनादिल ।