सत्यमोहनया किपा दुगु पाँय्म्वः पिदन

यल – वाङ्मय शताब्दीपुरुष सत्यमोहन जोशीया किपा दुगु पाँय्म्वः पिदंगु दु । यल महानगरपालिकां जोशीया शताब्दी जन्मोत्सवया लसताय् ग्वसाः ग्वःगु छगू ज्याझ्वलय् अर्थमन्त्री डा. युवराज खतिवडां उगु पाँय्म्वः सार्वजनिक यानादीगु खः । यल मनपां जोशीया किपा दुगु २५०० व १,००० तका वंगु पूर्णरुपय् वहया व १०० तका वंगु वह, सिजःलिसे मेमेगु धातु ल्वाकज्याःगु पाँय्म्वः पिथंगु खः ।

ज्याझ्वलय् नवासें मूपाहां अर्थमन्त्री डा. खतिवडां थःगु जीवनकालय् झिम्ह गर्भनर प्राप्त यानादीधुंकूम्ह जोशी थेज्याःम्ह व्यक्तित्व सम्मान यायेखंगु देय्या हे अहोभाग्य खः धासें जोशीया पाँय्म्वलं मुक्कं यल देय्यात हे लुमंकेत ग्वाहालि याइगु विश्वास प्वंकादिल । प्रतिनिधिसभाया दुजः पम्फा भुसालं उगु पाँय्म्वःयात लखौं पुस्तां अध्ययन व अवलोकन याये खनीगु जुल धासें लसता प्वंकादिल ।

यल मनपाया प्रमुख चिरिबाबु महर्जनं जोशीया किपा दुगु पाँय्म्वः नेपाल राष्ट्र बैंक मुद्रा व्यवस्थापन विभाग टक्सार महाशाखापाखें छापे यायेगु ज्या जूगु जानकारी बियादिसें जोशी जीवित इतिहास जूगुलिं वय्कःया किपा दुगु पाँय्मवःयात न्ह्याबलें कदर यानाः तयातयेगु जुइ धयादिल ।

यल मनपां उगु पाँयम्वः सर्वसाधारणया ल्हातय् अःपुक थ्यंकेया निंतिं यल मनपा ३ वडाया अध्यक्ष श्रीगोपल महर्जनया संयोजकत्वय् छगू टोली नं गठन याःगु दु ।

सम्बन्धित बुखँ

LEAVE YOUR COMMENTS