‘येँ मनपाया तःधंगु वडाय् पूर्वाधार विकासयात बजेट मगाः’

येँ – देय्या राजधानी येँया तःधंगु वडाय् पूर्वाधारया सन्तुलित विकास जुइमफयाच्वंगु दु । येँ महानगरपालिकाय् दुनेया वडाय् विकास जूसां नं छगुलिं मेगु वडा लिसे स्वाःगु सतकया पूर्वाधार विकास यायेत थाकूगु खँ धाःगु दु । चीधंगु क्षेत्रफल व म्हो जनसंख्या दुगु लिसे तःधंगु क्षेत्रफल व अप्वः जनसंख्या दुगु वडायात उकथं हे बजेट बिउगुलिं तःधंगु वडाया विकास यायेत थाकूगु खँ वडाया जनप्रतिनिधिपिंसं धाःगु दु ।

जनप्रतिनिधितय् कथं येँ मनपां ३ करोड स्वयां अप्वः बजेट वडायात बिउगु मदु । येँमनपाया मुक्कं बजेट १३ अर्ब दु । फुक्कं वडायात यानाः १ अर्ब नं मबिउगुलिं यानाः पूर्वाधार दयेकेत समस्या जुयाच्वंगु खँ १६ वडाया वडाध्यक्ष मुकुन्द रिजालं कनादीगु दु । पूर्वाधार कमजोर वडायात माक्व ध्यान मबिउगुलिं यानाः समस्या जुयाच्वंगु खँ वय्कलं धयादिल ।

सतक संरचना अस्तव्यस्त जूगुलिं धू ब्वया व ध्याचः जुयाः लँय् वनेत समस्या जुयाच्वंगु दुसा वडायाके माक्वः ध्यबा मदुगुलिं अज्याःगु सतक दयेकेगु ज्याय् समस्या जुयाच्वंगु खँ जनप्रतिनिधिपिंसं धायेगु यानाच्वंगु दु । येँ महानगरपालिका व मेगु नगरपालिका स्वाइगु सतक दयेकेगु ज्याय् सरोकार निकायं ध्यान बियाच्वंगु मदु ।

येँमनपाया दकलय् तःधंगु वडामध्ये १६ वडा व तारकेश्वर नगरपालिका स्वाइगु सतक जीर्ण जुयाः वये वनेत समस्या जुयाच्वंगु दु । गुकिं यानाः निभाः त्वइगु इलय् धू ब्वयाः सतकय् बांलाक खनेमदइगुलिं यानाः दुर्घटना अप्वया वनाच्वंगु खँ स्थानीय रामबहादुर रानामगरं कनादीगु दु ।

निगू नगर स्वाइगु सतक दयेकेगु ज्या प्रदेश सरकारया जूसां नं ३ नम्बर प्रदेशया ध्यान वनेमफुगुलिं यानाः वंगु दँय् बजेट तकं फ्रिज जूगु दु ।

सतकया विषयय् तःक्वः हे सरोकार दुगु निकायय् ध्यानाकर्षण यानाः नं सुयागुं ध्यान वनेमफूगु खँ नं वय्कलं कनादिल । निगू नगर स्वाइगु सतक दयेकेगु ज्या प्रदेश सरकारया जूसां नं ३ नम्बर प्रदेशया ध्यान वनेमफुगुलिं यानाः वंगु दँय् बजेट तकं फ्रिज जूगु खः । येँमनपां तारकेश्वर स्वाइगु सतक दयेकेगु निंतिं २ करोडया लागतय् बोलपत्र आह्वान यायेगु प्रक्रिया न्ह्याकूगु खँ वडाध्यक्ष रिजालं कनादिल ।

अथे हे वडाया ऐराहिति निसें नागर्जुन नगरपालिका वनेगु सतकय् नं प्रदेश सरकारं ध्यान मबिगुलिं येँमनपां हे दयेकेत्यंगु दु । उकिया निंतिं बाग्मती कन्स्ट्रक्स लिसे सम्झौता जुइधुंकूगु दु । तःधंगु भूगोल व अप्वः जनसंख्या दुगु यँेमनपाया ६, १४ व १६ वडा विकास निर्माणय् लिउने लानाच्वंगु दु । थुगु वडाया पूर्वाधार विकास तकसं म्हो जक जुयाच्वंगु दु ।

पूर्वाधार कमजोर जूगु वडायात येँमनपां ध्यान मबिउगु द्वपं वडाध्यक्षपिंसं बियाच्वंगु दु । वडा नम्बर ६ या वडाध्यक्ष दीपेन्द्रकुमार लामां फुक्कं वडायात समानुपातिक रुपय् ३ करोड बजेट बीगु स्वयां तःधंगु भूगोल दुगु व ग्रामीण भेगलिसे स्वाःगु वडाया विकासय् बः बीमाःगु खँ कनादिल ।

सम्बन्धित बुखँ

LEAVE YOUR COMMENTS