११ व १२ कक्षाया परीक्षा स्थगित

येँ– राष्ट्रिय परीक्षा बोर्ड सोनोथिमिनं कक्षा ११ व १२ या परीक्षा स्थगन याःगु दु । बोर्डया मंगलवाः च्वंगु बैठकं मेगु सुचं मवःतलेया निंतिं परीक्षा दिकेगु निर्णय याःगु खँ बोर्डया सदस्यसचिव दुर्गाप्रसाद अर्यालं जानकारी बियादीगु दु ।

कोरोना भाइरसया संक्रमण रोकथामया निंतिं लकडाउन जुयाच्वंगुलिं परीक्षा सरे यायेगु कि मयायेगु धयागु अन्योल जुयाच्वंगु इलय् बोर्डया बैठकं परीक्षा सरे यायेगु निर्णय याःगु खः । थ्वयां न्ह्यव बोर्डं कक्षा १२या परीक्षा वैशाख ८ व कक्षा ११ या वैशाख २१ गते निसें न्ह्याकेगु धयातःगु खः ।

बोर्डं कक्षा ११ व १२ या परीक्षाया निंतिं प्रश्नपत्र छापे यानाः तयारी अवस्थाय् तयातयेधुंकूसां ढुवानी यानाः जिल्ला जिल्लाय् थ्यंके धाःसा ल्यं दनि । बोर्डं देय्न्यंकं ११४७ गू परीक्षा केन्द्र निर्धारण यानातःगु खःसा कक्षा ११ व १२य् यानाः मुक्कं ९ लाख ६२ हजार विद्यार्थीत परीक्षाय् सहभागी जुइत्यंगु दु ।

अथेहे माध्यमिक शिक्षा परीक्षा एसईई लकडाउन चालेधुंकाः जक मेगु सुचं बियाः सुरु यायेगु धासें विद्यार्थीतय्त उकथं हे तयारी यायेत नं इनाप याःगु दु । बोर्डं लकडाउन मचायेकं परीक्षाया मिति क्वःमछिइगु खँ नं धाःगु दु ।