रेशम चौधरीया ‘अध्यक्ष’ पद खारेज

येँ (नेपालभाषा टाइम्स)- निर्वाचन आयोगं नागरिक उन्मुक्ति पार्टीया नेता रेशम चौधरी पार्टीया अध्यक्ष जुइ मफइगु निर्णय याःगु दु । पार्टीया अध्यक्षया रुपय् अद्यावधिक यायेत पार्टीपाखें बिउगु निवेदनयात कयाः म्हिगः निर्णय यासें आयोगं प्रचलित ऐन, नियमावली व पार्टीया विधान कथं नं अध्यक्ष जुइत चौधरी योग्य मजूगु खँ धाःगु खः ।
आयोगं अदालतया फैसला, पार्टीया विधान व मेगु कानुन व नजिर समेतया आधारय् उगु निर्णय यानागु खँ आयोगया प्रवक्ता शालिग्राम पौडेलं कनादीगु दु । राजनीतिक दल सम्बन्धी ऐन व अदालतया फैससाल कथं फौजदारी कसुरय् लाःम्ह मनू पार्टीया दुजः तकं जुइ मदइगु व्यवस्था कथं चौधरीयात अध्यक्षया रुपय् अद्यावधिक याये मफइगु निर्णय आयोगं याःगु खः ।

व्यक्ति हत्याया द्वपनय् चौधरीयात सर्वोच्च अदालतं जन्मकैदया सजाय न्यंकूगु खःसा प्रधानमन्त्री पुष्पकमल दाहालया सरकारं याःगु सजाय माफीया सिफारिस कथं राष्ट्रपति रामचन्द्र पौडेलं वय्कःयात माफी बिउगु खः । राष्ट्रपतिपाखें बिउगु माफी कैद सजायया नितिं जक खः धासें आयोगं माफीं कसुरपाखें उन्मुक्त मजुइगु निर्णय याःगु दु ।

उकथं हे पार्टीया विधान कथं याये धाःगु अधिवेशनया प्रक्रिया मिले मजूगु ठहर धासें आयोगं पार्टीया अध्यक्ष जुइत केन्द्रीय दुजः जूगु म्होतिं नं दछि पूवनेमाःगु व्यवस्थाया उल्लंघन जूगु ठहर नं याःगु दु । आयोगं पार्टीया विधान व प्रचलित ऐन कानुनया तकं बर्खिलाप विवरण बियाः अद्यावधिक यायेत स्वःगुलिं अध्यक्ष जुयाच्वंम्ह रञ्जिता श्रेष्ठयात नं सचेत याकूगु दु ।