लिपि गुथि न्हूधाः

येँ – नेपाल लिपि गुथिया झिंन्हय्क्वःगु तःमुँज्या गुथिया थःगु हे ज्याकू साःननि त्यःरय् जुल । गुथिया नायः निरञ्जन तबःया सभापतित्वय् जूगु तःमुँज्याय् छ्याज्ये पवित्र कसां वार्षिक प्रतिवेदन व दांभरिं उत्तम साय्मिं आर्थिक ल्याःचाः न्ह्यब्वयादीगु खः । न्वकु अनिल स्थापितं गुथिं नेपाल लिपिया प्रचार प्रसार व प्रवद्र्धनया निंतिं न्ह्याकेगु ज्याझ्वः बारे जानकारी बियादिल ।

वयां लिपा निगूगु सत्रय् गुथिया न्हूगु ज्यासना पुचःया ल्यज्या याःगु खः । न्हूगु ज्यासना पुचलय् निरञ्जन तबःयात हे हाकनं नायः ल्यःगु दुसा अनिल स्थापित, पवित्र कसाः व उत्तम साय्मियात छसिकथं न्वकु, छ्यांज्ये व दांभरिं ल्यःगु दु । ज्यासना पुचःया दुजलय् रमेशमान पिया, कमलतारा तुलाधर, विक्कि वज्राचार्य, लुमिन ताम्राकार, जगत पात्या, विमला मानन्धर व उदेन न्हूसाय्मि च्वनादीगु दु ।

न्हूगु ज्यासना पुचःया नायः तबःनं गुथिया विधान संशोधन यायेगु नापं वइगु कार्यकालय् नेपाल लिपि प्रवद्र्धनया निंतिं न्हू कथंया ज्या हयेगु खँ कनादिल ।गुथिया न्हूगु ज्यासना पुचः ल्यज्याया निंतिं किरण शाक्य संयोजक व गुथिया प्राज्ञपिं प्रज्ञामान शाक्य व राजेन्द्र शाक्य दुजः जुयादीगु निर्वाचन कमिटी गठन याःगु खः ।