सवारी साधनय् इम्बोस्ड नम्बर प्लेट

स्वनिगःया सतकय् थौंकन्हय् न्हूकथंया नम्बर प्लेट तयातःगु सवारी साधन चले जुयाच्वंगु खंके फु । झ्वाट्ट स्वयेबलय् भारतीय नम्बरया सवारी साधन थें खने दुगु थ्व सवारी साधन वास्तवय् भारतीय मखसे नेपाःया हे सवारी साधन खः । थ्व न्हूकथंया नम्बर प्लेट ‘इम्बोस्ड नम्बर प्लेट खः । थ्व इम्बोस्ड नम्बर प्लेटया सवारी खनीबलय् सर्वसाधारण जक मखु स्वयम ट्राफिक प्रहरी तकं झुके जुयाच्वंगु दु । इम्बोस्ड नम्बर प्लेटय् चलनचल्तीइ दुगु थेंज्याःगु नम्बर मखसे अंग्रेजीं च्वयातःगु दु । मुक्कं अंग्रेजीं च्वयातःगु इम्बोस्ड नम्बर प्लेटया कारणं उगु नम्बर प्लेटया सवारी व्यवस्थापन यायेगु बानी मदुगुलिं यानाः स्वयम ट्राफिक प्रहरी नं झुके जुइ मालाच्वंगु खः ।

तत्कालीन मन्त्रिपरिषद्या निर्णयकथं प्रदेशय् आधारित इम्बोस्ड नम्बर प्लेट तयेमाःगु व्यवस्था याःगु खः । दरवारमार्ग ट्राफिक प्रहरी ज्याकूया छम्ह प्रहरी जवानं इम्बोस्ड नम्बर प्लेटया कारणं थः तःक्वः हे अलमलय् लाःगु खँ धयादी । ‘नेपाली नम्बर प्लेटया सवारी साधन व्यवस्थापन याना वयाच्वंगु व थुकी हे बानी जुयाच्वंगुलिं यानाः इम्बोस्ड नम्बर प्लेटया सवारी साधन वइबलय् छु सवारी साधन, गनयागु सवारी साधन जुइ धकाः अन्योलय् लाइगु वय्कलं धयादी । स्वनिगलय् इम्बोस्ड नम्बर प्लेटया सवारी साधन चले जुयाच्वंगु खनीबलय् सर्वसाधारण नं छझाः गनयागु सवारी खः धकाः अलमलय् लाइगु जक मखसे स्वयम सवारी साधनया व्यवस्थापन यायेगु ज्याय् खटे जुयाच्वंपिं ट्राफिक प्रहरी नं अलमलय् लायेगु याः ।

इम्बोस्ड नम्बर प्लेटया बारे ज्ञान मदुगु व जडान शुरु जुइधुंकूगुलिं अप्वःथें ट्राफिक प्रहरी नं झुके जुइमालाच्वंगु खः । महानगरीय ट्राफिक प्रहरी महाशाखा प्रमुख सर्वेन्द्र खनालं इम्बोस्ड नम्बर प्लेटया सवारी साधन व्यवस्थापन यायेया निंतिं यातायात ज्याकूलिसें समन्वय यानाः ट्राफिक प्रहरीया निंतिं तालिमया व्यवस्था यायेत्यनागु धयादी । ‘नेपालय् इम्बोस्ड नम्बर प्लेटया शुरुवात नकतिनि जक जूगुलिं उकी झुके जुइगु स्वाभाविक खः, उकिं जिमिसं सकलें ट्राफिक प्रहरीयात इम्बोस्ड नम्बर प्लेटया बारे याकनं तालिम बीगु जुइ’, वय्कलं धयादी ।

सरकारं बागमित अंचलय् दर्ता जूगु चारपांग्रे सवारी साधनय् अनिवार्यरुपं इम्बोस्ड नम्बर प्लेट जडान यायेमाःगु व्यवस्था यायेवं लिपांगु इलय् इम्बोस्ठ नम्बरप्लेट तयेगु ज्या धमाधम जुयाच्वंगु दु । यातायात व्यवस्था विभागं बागमति अंचलय् दर्ता जूगु सरकारी व संस्थानया सवारी साधनय् वइगु चैत मसान्त तकया दुने व मेमेगु सवारी साधनयात २०७५ असार मसान्ततकया दुने अनिवार्यरुपं इम्बोस्ड नम्बर प्लेट जडान यायेमाःगु व्यवस्था याःगु दु । वयां लिपा मेमेगु सवारी साधनय् नं उकथं हे इम्बोस्ड नम्बर प्लेट जडान यायेगु ज्या न्ह्याकेगु तयारी जुयाच्वंगु दु ।

सरकारं थौंकन्हय् न्याताजि कथंया इम्बोस्ड नम्बर प्लेटया व्यवस्था याःगु दु । उकीमधये राष्ट्रपतिया सवारी साधनयात निशान छापसहितया नम्बर, सरकारी व संस्थानयात तुयुगु प्लेटय् ह्याउँगु नम्बर, कूटनीतिकयात तुयुगु प्लेटय् वँचुगु नम्बर, निजी सवारी साधनया निंतिं तुयुगु प्लेटय् हाकुगु नम्बर व भाडाया सवारी साधनया निंतिं म्हासुगु प्लेटय् हाकुगु नम्बर तयेगु व्यवस्था याःगु दु । अथे हे इम्बोस्ड नम्बरया न्हापांगु आखः क्रमशः मोटरसाइकलय् ‘ए’, कार जीप, डेलिभरी भ्यानय् ‘बी’, ट्याम्पु, अटोरिक्साय् ‘सी’, पावर टेलरय् ‘डी’ ट्याक्टरय् ‘इ’, मिनिबसय् ‘एफ’ व ट्रक, बसय् ‘जी’ तयेगु व्यवस्था यानातःगु दु ।

इम्बोस्ड नम्बर यातायात ज्याकुथिं कायेमाःसा नम्बर काये न्ह्यः आतक पुले ल्यं दुगु सवारी कर बुझे यानाः काये फइगु व्यवस्था यानाःगु दु ।
यातायात व्यवस्था विभागया महानिर्देशक रुपनारायण भट्टराईया कथं आतकया दुने १२०० सवारी साधनय् इम्बोस्ड नम्बर प्लेट जडान यायेगु ज्या जुइधुंकूगु दुसा थौंकन्हय् न्हिं सछिनिसें सत्या सवारी साधनय् इम्बोस्ड नम्बर प्लेट जडान यायेगु ज्या जुयाच्वंगु दु ।