ने. सं. ११४३ चौलाथ्व पारू -

युरिक एसिडय् छु नयेगु छु मनयेगु ?

छुं नं ल्वय् लंकेगु खःसा ल्वगिं वासः जक नयां मगाः । उकिया लिसेलिसें नसात्वँसाय् नं बिचाः यायेमाः । नसात्वँसा पाय्छि मजुल धाःसा न्ह्याक्व वासः याःसां ल्वय् लनी मखु। यूरिक एसिड अप्वः दुपिंसं नं वासः जक नयां मगाः । नयेत्वनेगुलिइ नं ध्यान बीमाः ।

यूरिक एसिडया मात्रा अप्वः जुलकि हर्ट डिजीज, हाइपरटेन्सन, किडनी स्टोन व बाथ थेंज्याःगु ल्वचं कयेफु । अथे जुयाः यूरिक एसिडया मात्रायात न्ह्याबलें नियन्त्रणय् तयातयेमाः ।

छु छु नयेगु?

म्हय् यूरिक एसिडया मात्रा म्हो यायेत आहारय् हिउपाः महसें मजिउ, अथे जूगुलिं थःगु डाइटय् चेरी, ब्लुबेरी व स्ट्रबेरी थेंज्याःगु सि नं दुथ्याकादिसँ ।
यूरिक एसिडय् आलु, मटरकःछे, च्याउ, अंगूर, अम्बः, प्याज, कचिगु मेवा, आमाःसि, सन्तरासि, ब्रोकाली, ह्याउँगु ग्वारामल्ता, गोलभ्यारा, भान्ता व वाउँचा सेवन यानादिसँ ।
मुसूकेँ, मुस्या, कःनि, थीथी बूबः काजु, पेस्ता थेंज्याःगु मसला व तोफु थेंज्याःगु तरकारिया सेवन यानादिसँ ।
ओट्स, ब्राउन राइस व तछ्वयात नं नसात्वँसाय् दुथ्याकादिसँ ।
लौकाया जूस, कागतिया रस, नैंक्याःलः, गाजर व चुकन्दरया जूस, एलोभेरा जूस, तुसिया जूस, अम्बःया रस व ग्रीन टी त्वनादिसँ ।
बहनी द्यने त्ययेकाः निगः वाउँसे च्वंगु सुकुमेल छगू गिलास लुमुलुमु धाःगु लःलिसे त्वनादिसँ ।
लः यक्व त्वनादिसँ, लःया उचित स्तर सिस्टमं यूरिक एसिडयात पितछ्वयत मदयेकं मगाः ।
म्हय् यूरिक एसिडयात कम यायेत अथवा उकिया मात्रा नियन्त्रित यायेत इमू छगू मेगु प्रभावी तरिका खः । धाथें ला इमू प्राकृतिक मूत्रवद्र्धक नं खः । थुकिं हिइ एसिडया स्तरयात नियन्त्रित यानाः मनावःगु कम यायेत ग्वाहालि याइ ।
थ्व ला सकसिनं सिउ कि ओलिभ आयलय् दयेकातःगु नसात्वंसा म्हया निंतिं दकलय् लाभदायक जुइ । थुकी भिटामिन ई प्रशस्त मात्राय् दइगु जुयाः नसाज्वलंयात थीथी पोषकतत्वं जायेकाबी । थुकी दयेकातःगु नसाज्वलं नयेबलय् म्हय् युरिक एसिड उलि हे जक उत्पन्न जुइ, गुलि म्हयात मदयेक मगाःगु खः । अथे जूगुलिं ओलिभ आयलया सेवन याये हे माः ।
छगू गिलास लखय् बागू चम्चा बेकिंग सोरा ल्वाकछ्यानादिसँ । थुकियात बांलाक संकाः नियमित रुपं त्वानादिसँ । बेकिंग सोराया मिश्रणं युरिक एसिडया क्रिष्टल भंग यायेत व यूरिक एसिडया घुलनशीलतायात अप्वयेकेत ग्वाहालि याइ । बेकिंग सोराया सेवन यायेबलय् भचा सावधान जुइमाः, छाय् कि थकिं ब्लड प्रेसर अप्वयेके यः ।
म्हय् एसिड अप्वः जुयावलकि उकियात एसिडोसिस धकाः धाइ । थ्व म्ह्या यूरिक एसिडया स्तरलिसे तप्यंक स्वानाच्वंगु दु। यदि म्हय् पी एच माःगु स्तर स्वयां कुहां वनकि म्हं एसिडिक जुयावनी । अथे मजुइकेत आहारय् स्याउ, चेरीया जूस व कागति दुथ्याकादिसँ ।
छगू रिसर्चं सीदुकथं म्हय् मनावइगु म्हो यायेमाः । मनावःगु म्हो यायेत बेरिजं ग्वाहालि याइ । यूरिक एसिड मेमेगु नसाज्वलंनं ग्वाहालि याइ । भुइँकटहरय् दुगु पाचक एजाइम ब्रोमेलाइनय् एन्टि फ्लाइमेटरी तत्वं मनावःगु म्हो याइ । यूरिक एसिडयात कन्ट्रोल यायेगु खःसा प्यूरिन दुगु आहारया सेवन मयायेमाः । किडनीया समस्या जुलकि प्यूरिन प्रशस्त दुगु नसाज्वलनं म्हया थीथी भागय् अप्वः थें यूरिक एसिडयात म्हय् स्वानाबी । आहाराय् हिउपाः हयाः वं पाय्छि आहारया सेवन यानाः थ्व ल्वय् मजुइका च्वनेफु ।

छु छु मनयेगु?

यूरिक एसिडय् ओमोगा ३ फेट्टी इसिड तसकं मनिं । टुना, सारडिनेस, म्याकरील, साइमन थेंज्याःपिं न्याय् फेट्टी एसिड प्रशस्त दइ । अथे जूगुलिं यूरिक एसिड अप्वयाच्वंगु इलय् थज्याःपिं न्यात नयेमजिउ ।
यूरिक एसिडय् बट्टाया नसाज्वलं, वियर, अय् लाः, केक, पेस्ट्री, क्रीम, विस्कुट, कुकीज, ख्वला मदुगु केँ, जा, अचार, फास्टफूड, कोल्ड ड्रिंक्स, ख्येँय्, रेडमीट आदि नयेमजिउ ।
फ्रक्टोज कयादी मते । प्राकृतिक रुपं एसिडयात कम यायेत फ्रक्टोज प्रशस्त दुगु तवँसा त्वनेगु कम यायेमाः । छगू रिसर्चं सीदुकथं गुपिं मनूत अप्वः मात्राय् फ्रक्टोज दुगु त्वँसा त्वनीपिं खः, उमित बाथ ल्वय् जुइगु खतरा दुगंछि अप्वः दइ ।
तौलय् कन्ट्रोल तयादिसँ । आपाः ल्ह्वंकाच्वंपिं मनूतय्सं प्यूरिन यक्व दुगु नसाज्वलं नयेगु यानाच्वनी । प्यूरिन प्रशस्त दुगु नसाज्वलनं यूरिक एसिडया स्तर अप्वयेकाबी । दकलय् ला थ्व तीव्रगतिं तौल कम जुइकीगु छगू कारक नं खः । उकिं न्ह्याम्हेसिनं नं क्रैश डायटिङ्गपाखें फयांफछि बचय् जुइगु यायेमाः । तसकं ल्ह्वंपिं मनूतय्सं
यूरिक एसिडया स्तर अप्वः जुइ मफयेकेत थःगु तौल क्वकायेगु यायेमाः ।