कथु स्याःगु, मनावःगु व इन्फेक्सनया घरेलु उपचार
अप्वः पाउँ, पालु, मसलादार अथवा घ्यलय् सियातःगु, चिकनय् पुकातःगु नसाज्वलं नयेगु यातकि कथुइ समस्या जुइयः । गबले गबलें सर्दिं यानाः नं कथु स्याइगु व मनावइगु जुइ, अले स्वरयन्त्र स्यनी, कथुं सः पिहां वयेगु बन्द जुइ, अले कथु स्यानावइ । टन्सिल, इन्फेक्सन, भाइरल ज्वरो, मुसु आदि ल्वचय् नं कथु स्याइगु जुइ । थथे जुइबलय् छुं नयेबलय् समस्या जुइ, अले ई घुर्केबलय् नं कथु स्याइ । कथु स्याइबलय् दकलय् अप्वः चान्हय् समस्या जुइ, छाय्कि छक्वःपतिकं ‘खाय् क… खाय्क…’ याये मालाच्वनी । अथे यायेबलय् कथुइ घाः नं जुइफु। थुकिं यानाः हिइसे च्वनीगु व सः सुइगु नं जुइ । ब्रोंकाइटिस ल्वचय् नं मुसु व याः ल्वगिया कथुइ समस्या जुइ । वाउँगु, म्हासुगु व हि खनेदुगु खै पिहां वइ, अले गःपः व ब्वहलय् थ्यंक हे स्याइ । यदि कथुइ तसकं बांमलाक घाः जुल अथवा ताःई तक छि थ्व समस्यां पीडित जुयाच्वन धाःसा डाक्टर क्यनाः वासः याकादिसँ । मखुसा थुकथं घरलु उपचार नालादिसँ –
→ कथु स्याःगु लंकेत चिधंगु चम्चां निगू चम्चा इमू बागू लीटर लखय् १५–२० मिनेट दायेकाः छानय् यानादिसँ, अले उकी चि भतिचा तयादिसँ । थ्व लखं सुथन्हापां छक्वः व बहनी द्यने त्ययेकाः छक्वः गललल यानादिसँ, तुरुन्त हे फाइदा जुइ ।
→ कथुइ मनावयाच्वंगु दु, अले कफ नं पिहां वः धयागु खःसा बहनी द्यने न्ह्यः बागू चम्चा इमू नचुक न्ह्ययाः क्वाःलखं क्वचिनादिसँ । थुकिं कफ दयावयेगु बन्द यानाबी ।
→ कथु स्याइबलय् ग्वःसगं व मिश्री उति उति हे मात्राय् ल्वाकछ्यानाः छगू चम्चाया ल्याखं कयाः न्हिं निक्वःस्वक्वः तक निन्हुस्वन्हु न्ह्ययेगु या नाः च्वनादिसँ । थुकिं माउथ अल्सर जुयाच्वंगु दुसां लनावनी ।
→ न्यागः–खुगः मलय् व खुहः न्हय्हः तुलसीहः कयादिसँ । थुकियात छगू कप लखय् दायेकाः काढा दयेकादिसँ, अले त्वनादिसँ । थथे न्हिं स्वक्वः स्वन्हु तक त्वनादिसँ, कथु स्याःगु लनावनी ।
→ मलय् लिसे बागू चम्चा घ्यः व निनातःगु मिश्री ल्वाकछ्यानाः नयाबिल धाःसां कथुयात फाइदा जुइ ।
→ मलय्, लवं, चि व नीहःया काढां नं कथु स्याइबलय् यक्व ज्या याः ।
→ कथु स्याइबलय् ग्वाःया हा म्हुतुइ तयाः चुचुप्यानातल धाःसां नं फाइदा जुइ ।
→ पालुया ति, लवंया चुं व हिं ल्वाकछ्यानाः न्हिं स्वक्वः फ्ययादिसँ ।
→ फ्वंगाःगु फट्किरि २ ग्राम (बागू चम्चा) बागू गिलास (१२५ ग्राम) क्वाःलखय् संकाः न्हिं स्वक्वः गलल गलल यायेगु यानादिल धाःसा कथु स्याःगु व मनावःगु नितां लनावनी । थ्व बाहेक कथु ख्याप्प च्वंच्वनीगु, छक्वःनिक्वः मुसु मतयेकं सः बांलाक पिहां मवइगु, कथुया निखेरंया ग्वारा (गुगु गबलें गबलें मनावइ, अले थ्व ग्वारा स्यानाः छुं नं नयेत्वने याये थाकुइ) अर्थात टन्सिलयात नं फाइदा याइ, अले कथुइ दुने ला ब्वला वयाच्वंगु दुसा लनावनी ।
→ अनारया ख्वलाय् १० गुना लः ल्वाकछ्या (नाः काढा दयेकादिसँ । थुकी लवं व फिटकिरि निनाः ल्वाकछ्यानादिसँ । थुकिं गललल यातकि कथु वाल (ावाला मिंगु, स्याःगु व सः सूगु थिक जुयावनी ।
→ कथु झ्यातुयाच्वन अथवा स्यानाच्वन धाःसा बाफ कयादिसँ । न्ह्यागुसां थलय् लः क्वाकाः रुमालं ख्वाः त्वपुयाः बाफ कयादिसँ । थथे यायेबलय् नं कथु स्याःगु लं ।
→ कथु स्याइबलय् व मनावइबलय् सियातःगु पुकातःगु, बासि, ख्वाउँगु चीज, धौ, कडा मसला, पाउँ, कोल्ड ड्रिंकया सेवन यायेमजिउ, छाय्कि थज्याःगु चीजं इन्फेक्सन तच्वयेकी ।
LEAVE YOUR COMMENTS