जि खनाः पद्मरत्न लय्मताः ः दाहाल

येँ – पुलांम्ह प्रधानमन्त्री लिसें नेकपाया अध्यक्ष पुष्पकमल दाहाल प्रचण्डं जनयुद्ध लिपा नं वयेमाःगु गुलिखे अधिकार मवःगु कारणं शान्ति प्रक्रियाया सूत्रकार पद्मरत्न तुलाधर थः खनाः तम्वयाच्वंगु खँ कनादीगु दु । भाजु तुलाधरया ज्याःजंक्वया लसताय् ‘शान्ति प्रक्रियाय् पद्मरत्नया भूमिका’ विषयय् म्हिगः जूगु गोष्ठीइ न्ववासें वय्कलं थ्व खँ कनादीगु खः ।

यदि पद्मरत्न मदुगु खःसा जनयुद्ध लिपाया राजनीतिक कोर्श आः थें मजुइगु बिचाः नं वय्कलं प्वंकादिल । नेकपाया नेता वामदेव गौतमं शान्ति प्रक्रियायात सफल यायेगु ज्याय् गिरिजाप्रसाद कोइराला, प्रचण्ड व माधव नेपालया तःधंगु भूमिका दुसा वय्कःपिंत सहज यायेगु ज्या तुलाधरं यानादीगु खः धयादिल ।

नेवाः न्ह्यलुवा मल्ल के. सुन्दरं नेवाःतय् पहिचान वयेक ३ नम्बर प्रदेशया नां तयेफुसा जक शान्ति प्रक्रियाया उपलब्धी सार्थक जुइ धयादिल । लक्ष्मीदास मानन्धरया सभापतित्वय् जूगु उगु सभाय् पूर्व सभामुख दमननाथ ढुंगाना व पूर्व महा–न्यायाधिवक्ता मुक्ति प्रधानं नं न्ववानादीगु खः ।