लुँखुसिइ प्रशोधन यानाः शुद्ध लः वितरण

यल – लुँखुसि मां पुचःया विशेष सक्रियताय् लुँखुसि लागाय् शतप्रतिशत शुद्ध लः वितरणया ज्या न्ह्याःगु दु । पुचःया सक्रियाताय् सोलाका फाउन्डेसन व यल शहरी वातावरण व्यवस्थापन (युम्स)या आर्थिक व प्राविधिक ग्वाहालिं उगु ज्या न्ह्याःगु खः । मेलम्चीया लः वइगु खँय् विश्वस्त जुइ मफयाच्वंगु व उकिसनं मेलम्ची व हे वल धाःसां नं गुलितक शुद्ध लः वइगु धइगु आशंका जुयाच्वंगु इलय् लुँखुसि मां पुचलं उकथंया अनुकरणीय ज्या न्ह्याकूगु खः ।

जनस्तरं हे लः प्रशोधन यानाः शुद्ध लः विक्री वितरण तकं यायेकथं उगु परियोजनाया उलेज्या जूगु दु । थौंकन्हय् बजारय् वयाच्वंगु मिनिरल व जारया लः ९२ प्रतिशत अशुद्ध जूगु खँ पिहां वयाच्वंगु इलय् मां पुचःया सक्रियताय् १००० लि. लः प्रशोधनया निंतिं बायोस्यान्ड फिल्टर जडान यायेगु ज्या जूगु खः । पुचलं बिउगु जानकारीकथं प्रतिघन्टा ६०० लि लः प्रशोधन याये फइगु उगु प्रणाली जडान लिपा ‘लुँखुसि लः’ नां तयाः जार व १ लिटरया बोटलय् विक्री वितरण यायेगु योजना दु ।

सामाजिक व सांस्कृतिक ख्यलय् जक सक्रिय जुया वयाच्वंगु पुचलं मिसातय्त आर्थिक रुपं नं तिबः बीगु ल्याखं उकथंया प्रणाली जडान यानाः लः प्रशोधन यानाः विक्री वितरण यायेगु ज्या न्ह्याकूगु खः । उगु योजनाया उलेज्या यल महानगरपालिका १७ वडाअध्यक्ष विनोद महर्जन व युम्सया निर्देशक प्रेम सिं महर्जनं मंकाःकथं उलेज्या यानादीगु खः ।

लुँखुसि त्वाःया नायः ज्ञानबहादुर महर्जनया विशेष उपस्थितिइ जूगु ज्याझ्वलः पुचःया नायः कान्छि महर्जनया सभापतित्वय् जूगु खःसा पुचःया सिता महर्जनं लसकुस यानादीगु खः । ज्याझ्वलय् लः व सहरी वातावरण सम्बन्धी ज्या याना वयाच्वंगु युम्स व फाउन्डेसनपाखें १५ गू लाख तका लागतय् निर्माण याःगु थुगु परियोजना प्यंगूगु जूगु जानकारी नं बिउगु खः ।