यतखा बहाःया पुनःनिर्माण

येँ- येँ महानगरपालिका वडा नं. १९ स्थित यतखा बहाःया पुनःनिर्माण क्वचाःगु दु । यतखा बहाः पुनःनिर्माण क्वचाःगु लसताय् पुनःनिर्माणय् ग्वाहालि यानादीपिंत दोसल्लां न्ययेकाः हनेज्या याःगु दु ।

यतखा बहाः पुनःनिर्माण समितिया नायः तेजरत्न ताम्राकारया सभापतित्वय् न्ह्याःगु ज्याझ्वलय् बहाः पुनःनिर्माणय् थीथी कथं ग्वाहालि यानादीपिंत बागमति प्रदेश सांसद राजेश शाक्यं हनापौ देछानादीगु खःसा १९ वडाअध्यक्ष राजेश श्रेष्ठं दोसल्लां न्ययेकादीगु खः । समितिया नायः ताम्राकारपाखें यतखा बहाः आगंद्यः व धर्मधातु चैत्यय् विराजमान जुयाबिज्याःपिं पंचबुद्धया पुजा यानादीगु ज्याझ्वःया बागमति प्रदेश सांसद शाक्यं त्वाःदेवाय् मत च्याकाः उलेज्या यानादीगु खः ।

स्वनिगःया बहाःबहीमध्ये क्षेत्रफलया ल्याखं दकलय् तःधंगु बहाःकथं कयातःगु यतखा बहालःयात श्री भाष्करकीर्ति महाविहारया नामं नं म्हसिउ । पुलांगु चिकं अप्पा दक्वं लिकयाः न्हूगु चिकं अप्पा लानाः बहाःया पुनःनिर्माण याःगु खः ।

यतखा बहालय् विशाल वज्रधातु चैत्य, त्रयोदश चक्रावली, सुवर्णमय छत्रमयं शोभायमान शिखरकुट शैलीया देगः, अवलोकितेत्तवर देगःत पलिस्था यानातःगु दु ।
मूपाहां प्रदेश सांसद शाक्य, वडाअध्यक्ष श्रेष्ठ व समितिया नायः ताम्राकारं बहाःया थीथी पक्षयात कयाः नुगःखँ तयादीगु खःसा समितिया दांभारिं पवन शाक्यं पुनःनिर्माणया ल्याःचाः न्ह्यब्वयादीगु खः ।