ने. सं. ११४४ ञलाथ्व नवमी -

साझाय् ध्यबा मपुसे बस गइपिं अप्वल

येँ – थौंकन्हय् येँ मनपाया आर्थिक ग्वाहालिं चले जुयाच्वंगु साझा यातायातय् ध्यबा मपुसे बस गइपिं अप्वयाः कम्पनी हैरान जूगु दु । उकिं आः साझां बस गये न्ह्यः हे अनिवार्य रुपं टिकट कायेमाःगु नियम दयेकेत्यंगु दु ।साझां टिकट मकाइपिं यात्रु व टिकट मबीपिं कर्मचारीयात कारवाही यायेगु तयारी समेत यानाच्वंगु खँ कामु प्रमुख कार्यकारी अधिकृत महेन्द्रराज पाण्डें कनादीगु दु । साझा यातायातय् गुलिखे यात्रुं टिकट कायेगु वेवास्ता याःगुलिं टिकट मबीम्ह व मकाइम्हेसित कारवाहीया व्यवस्था यायेत्यंगु खः । यात्रा याइम्हेसिया टिकट कायेत थाकु चाः’ वय्कलं धयादी, ‘यात्रुयाके टिकट कयाः जक यात्रा यायेमाः धइगु धारण ब्वलंके फयाच्वंगु मदु ।’

थौंकन्हय् मनपां जारी यानातःगु ज्येष्ठ नागरिक परिचयपत्र व विद्यार्थी सहुलियत पत्रया कारणं साझा गइपिं आपालं यात्रुतय्त सितिकं व छुट बियाः गाडी गयेके माःगु जुयाः ध्यबा उठे यायेत थाकुयाच्वन धइगु खँ वयाच्वंगु दु । थुकिं यानाः साझा घाटाय् वंगु ल्याःचाः समेत पिहां वयाच्वंगु दु ।
साझा गइपिं गुलिखे वृद्धवृद्धात गनं वने म्वाःसां रिंगरोड चाःहिलेगु लागिं जक जूसां बस गयेत वयाच्वंगु खँ नं धाःगु दु । ध्यबा पुलीपिं यात्रुतय्सं नं टिकट मकाइगु जूगुलिं अज्याःगु ध्यबा समेत दुहां मवःगुलिं कम्पनीयात घाटा वनाच्वंगु सीदुगु दु । येँ मनपां ५ करोड व यल मनपां १ करोड तकाया साझा यातायातया शेयर लगानी यानातःगु दु । मेगु लगानी सरकारी निकायं यानातःगु दु ।