बाइक गयाः सिखः लुटे याइपिं सक्रिय

येँ – वंगु छुं न्हिं न्ह्यवंनिसें येँया थीथी थासय् मोटरसाइकलय् वयाः लँय् न्यासि वनाच्वंपिं मिसापिनिगु लुँ सिखः लाका यंकीपिनिगु पुचः सक्रिय जुयाच्वंगु लूगु दु । थ्व झ्वलय् शुक्रवाः जक महानगरीय प्रहरी परिसर येँनं खटे जूपिं प्रहरी पुचलं अथे सिखः लुटे याइपिं स्वम्हेसित ज्वंगु दु । उमित येँया बसुन्धारा व यलं ज्वंगु खः ।

ज्वंपिं टमबहादुर सुनवार, टलकबहादुर रायमाझी व भारतया देवासिस दोलही जूगु खँ प्रहरीं धाःगु दु । प्रहरीं उपिंपाखें लुटे याना यंकूगु सिखः मियाः वःगु २,५०,५०० तका दां व लुटपाटय् छ्यःगु बा. २९ प ७२७६ नम्बरया मोटरसाइकल नं बरामद याःगु दु । अथे हे लुँ थें खनेदुगु सिखः छपु, लुँ लनेत छ्यलीगु मेसिन छगः, मोबाइल न्यागः, लुटपाटया इलय् छ्यलीगु कापः व हेलमेट नं लुटेरा टमबहादुरया क्वथां बरामद याःगु खँ प्रहरीं धाःगु दु ।

उमिसं झिम्ह स्वयां अप्वः मिसातय्गु लुँया सिखः अथे मोटर साइकल गयाः लुटपाट याःगु खँ नं प्रहरी अनुसन्धानं सीदुगु दु । ज्वंपिं मध्ये टमबहादुर व टलकबहादुर न्हापा न्हापा नं थज्याःगु घटनाय् स्वदँ जेलय् च्वनेधुंकूपिं खः धाःगु दु । सिखः लुटे यायेगु ज्याय् मेपिनिगु नं संलग्नता दयेफइगु अनुमान यासें प्रहरीं थप अनुसन्धान न्ह्याकाच्वंगु खँ नं धाःगु दु ।