ने. सं. ११४४ कौलाथ्व पारू - नःलास्वनेगु

सरकारं विदेशी लगानी लित छ्वयेगु स्वयाच्वन

येँ – सरकारं छक्वः कम्पनीया सञ्चालक बोर्डं पारित याना तयेधुंकूगु विषययात हाकनं मन्त्रालयय् वनेगु इलय् दोहोरो निर्णय याये माःगु प्रावधान न्ह्यःने हयाः लगानीकर्तातय्त अलमल यानाः लगानी लित छ्वयेगु दुष्प्रयास यानाच्वंगु उद्योग व्यवसायीतय्सं धाःगु दु ।

छुं ई न्ह्यः जक आपूर्ति मन्त्रालयं लगानीया लागिं खुल्ला यायेगु निर्णय याःसां नं उगु लगानीइ नं शेयरय् परिणत याकेगु कथं थःपिनि नियन्त्रणय् तयेमाःगु जिकीर अर्थ मन्त्रालयं यायेवं लगानीकर्ताता हतोत्साहित जूगु दु । विदेशी कम्पनीतय्सं नेपाःया थीथी लागाय् लगानी याइगु इलय् गबलें अनुदान कथं व गबलें निब्र्याजी त्यासा कथं लगानी याना वयाच्वंगु दु ।

थन देय् दुनेया लगानीकर्तातय्त हेवाय् चवाय् याइथें विदेशीतय्त नं थःपिनिगु हे मातहतय् च्वनाः जक लगानी यायेमाःगु खँ लागू यायेवं उपिं लिचिउगु दु । नकतिनि हे जक नेपाः दुनेया थीथी लागाय् च्वंगु छुं कम्पनीइ थथे विदेशी लगानीया लागिं उत्साहित जुया वःपिं बहुराष्ट्रिय कम्पनीया लगानीकर्तात थुगु गलत सरकारी नीतिं लिहां वंगु खँ आपूर्ति मन्त्रालय श्रोतं धाःगु दु ।

कम्पनीया साधारणसभां छक्वः पारित याना तयेधुंकूगु चीजयात हानं दोहोरो पारित यायेमाःगु व छगू मन्त्रालयं स्वीकृति बिइधुंकूगु विषययात हाकनं मेगु मन्त्रालयं स्वीकृति कायेमाःगु थेंज्याःगु गलत नीतिं लगानीकर्तात नेपालय् लगानी यायेगु खँय् उत्साहित जुइगु पलेसा लिहां वनीगु ग्याचिकु ब्वलनाच्वंगु दु ।

थ्व सम्वन्धय् विदेशीं अनुदान कथं बिइगु रकमयात नेपालं शेयरय् परिणत याये मजिउ धइगु पक्षय् नेपाःया राष्ट्रिय पूँजीपतित दुगुलिं सरकारं पिनेयापिंत लगानी अप्वयेकेगु लागिं याकनं स्पष्ट नीति हयेमाःगु थःगु नां न्ह्यमथनेगु शर्टय् छम्ह नेपाःया पुलांम्ह ब्यापारी धाःगु दु ।

सरकारं थःपिनिगु योजना अनुसारं विदेशीया लगानी अप्वयेकेगु इलय् नं उकियात शेयर कथं तयेमाः धइगु खं न्हूपिं व्यापारीत तकं निरुत्साहित जूगु दु ।

छुं नं कम्पनीया साधारणसभां छक्वः पारित याना तये धुंकूगु चीजयात हाकनं दोहोरो पारित यायेमाःगु धइगु कथं सरकारं आः जिकीर यानाच्वंगु नीति व्यापार व्यवसायया प्रवद्र्धन यायेगु सरकारी योजना व मर्यादा अःखः जूगु थःगु नां मकंसें छम्ह व्यापारी कनादिल ।