नेपाल संवत् छ्यलेगु सरकारया तयारी – पञ्चाङं सुझाव काल

येँ (नेपालभाषा टाइम्स)- नेपाल संवत्यात सरकारी दस्तावेजय् नं छ्यला यंकेगु धकाः नेपाल सरकारं याःगु निर्णय कार्यान्वयन यायेगु लागिं सरकारं तयारी शुरु याःगु दु । थ्व झ्वलय् थ्व संवत् गय् यानाः छ्यला यंकेगु धकाः सरकारयात सुझाव बीगु लागिं पञ्चाङ्ग निर्णायक समितिं म्हिगः सहलह यात ।

नेपाल संवतयात सरकारी दस्तावेजय् छ्यलेगु निर्णय कार्यान्वयन यायेगु नितिं थःपिंत छ्वयाहःगु पौयात कयाः समितिं म्हिगः सरोकारवाला पक्षतनाप सहलह ब्याकूगु खः ।
पञ्चाङ्ग निर्णायक समितिया नायः पं. श्रीकृष्ण अधिकारीया उपस्थितिइ जूगु उगु सहलहय् संस्कृति मन्त्रालयं विक्रम संवत गुकथं छ्यलीगु खः, उकथं हे नेपाल संवत नं छ्यलेगु व थुकिया नितिं माःगु निर्णय यानाः छ्वयाहयेत निर्देशन ब्यूकथं थथे सहलह मुँज्या याःगु खः ।

सहलह मुँज्याय् नेवाः देय् दबूया नायः पवित्र वज्राचार्य, नेपाल संवत् न्हूदँ राष्ट्रिय समारोह समितिया सचिवालय दुजः सुजीव बज्राचार्य व मचाराजा महर्जन, नेपाल संवत तिथिपौया अभियन्ता डा. भगवानदास मानन्धर, राष्ट्रिय विभूति शंखधर प्रतिष्ठानया श्याम मानन्धर, दैवज्ञ ज्योतिष रति ज्योति श्रेष्ठलिसें थीथी ज्योतिषपिनि उपस्थिति दुगु खः ।

सहलह मुँज्यां नेपाल सरकारया दस्तावेजय् विक्रम संवत् गथे खः अथेहे नेपाल संवत् नं छ्यलेगु नितिं सूचना विभागपाखें नेपाल सरकारं पिथनीगु क्यालेन्डरय् गथे च्वयातःगु खः, अथेहे च्वयेगु खँय् ताःई सहलह जूगु खः ।

सरकारया दस्तावेजय् गथे ‘वि.सं. २०८० मंसीर १० गते आइतवाः’ धकाः च्वइगु खः, अथेहे ‘ने.संं. ११४४ कछलाथ्व चतुर्दशी’ च्वयेगु धकाः मुँज्यां निर्णय याःगु खः ।
लिसें मुँज्यां नेपाल सरकारया दस्तावेजय् नेपाल संवतया मौलिकता कथं आखलं हे तिथि च्वयेगु सुझाब बीगु निर्णय नं याःगु दु ।

वंगु ने.सं. ११४३ कौलागा अमाई ९ (कार्तिक २७ गते) सोमवाः नेपाल सरकारया मन्त्रिपरिषदं नेपाल संवतयात नं सरकारी दस्तावेजय् च्वयेगु निर्णय याःगु खः ।