प्रेस काउन्सिलया उजुरीइ निगू पक्षया दथुइ मेलामिलाप

येँ – प्रेस काउन्सिल नेपालय् मानहानी, आचारसंहिता उल्लंघन जूगु विषययात कयाः आपालं उजुरी लायेगु यानाच्वंगु न्हूगु खँ मखु । थज्याःगु उजुरीयात कयाः प्रेस काउन्सिलं फछ्र्यौट नं यायेगु याना वयाच्वंगु दु । थ्व झ्वलय् प्रेस काउन्सिल नेपालय् छगू उजुरीयात कयाः जूगु सहलह लिपा निगू पक्षया दथुइ मेलमिलाप जूगु दु ।

प्रेस काउन्सिलया मध्यस्थताय् ओशो तपोवन व नेपाल आज डटकमया दथुइ जूगु सहलह लिपा मेलमिलाप जूगु खः । निगू पक्षया दथुइ मानहानी जुल धकाः उजुरीकर्ता छ्वया हःगु खण्डन गथे खः अथे छापे यायेगु व उजुरीकर्तायात नं थःगु धापू तयेत गाक्कं ई बीगु विषयय् सहमति जुइवं मेलमिलाप जूगु खः ।

अथे हे वंगु बैशाख १४ गते पूरा समाचार डटकमपाखें नेपाल टेलिकमया विषयय् समाचार सम्प्रेषण जूगु उजुरीयात कयाः नं सहमति जूगु दु । टेलिकमपाखें तःगु उजुरीयात कयाः काउन्सिल व पुरा समाचार डटकमया सम्पादक दथुइ जूगु सहलह लिपा टेलिकमपाखें प्राप्त खण्डनयात थ्व स्वयां न्ह्यः सम्प्रेषण जूगु दक्वं समाचारया शीर्षक उल्लेख यानाः उकिया विषयय् टेलिकमपाखें प्राप्त खण्डनया व्यहोरा स्पष्ट यानाः खण्डन प्रकाशन यायेगु खँय् सहमति जूगु खः । उजुरी तइपिनिगु ल्याः अप्वयेवं याकनं याकनं उकियात क्वचायेकेगु विधि नालेमाःगु काउन्सिलं न्ह्यथंगु दु ।