बन्दया नामय् निगः गाडी च्याका बिल

येँ – नेत्रविक्रम चन्द ‘विप्लव’ पाखें थः नेता माइला लामा लिसें आपालं कार्यकर्ता ज्वंगु विरोधय् म्हिगः याःगु बन्दया झ्वलय् निगः गाडी च्याका बिउगु दु । लिसें अन थीथी शंकास्पद वस्तु नं लुइकूगु दु । माइला लामायात ज्वंगु विरोधय् विप्लव पुचलं बागमति, नारायणी अञ्चल लिसें रामेछाप व दोलखा जिल्ला बन्द याःगु खः ।

बन्दया झ्वलय् हेटौंडा–नारायणगढ खण्डय् बा. ५ प १७३९ नम्बरया ट्रक व मकवानपुरया हे फाखेलय् बा. १४ च ८२३४ नम्बरया कारय् मि तयाबिउगु खः । मिं नयाःकार पूर्ण रुपं क्षति जूगु दुसा ट्रकया न्ह्यःनेया ब्व क्षतिग्रस्त जूगु दु । अथे हे नुवाकोट, सिन्धुपाल्चोक व रौतहटय् वडा कार्यालयया ज्याकुथी मि तयाबिउगु दु ।

नुवाकोटया ककनी गाउँपालिका–१ या वडा कार्यालयय् म्हीग बहनी बम मुइकूगु खःसा उकी लानाः कार्यालयया महत्वपूर्ण भ्वं व उपकरणत क्षति जूगु दु । रौतहटया चन्दपुर नगरपालिकाया गैडाटारय् च्वंगु वडा ज्याकुथी म्हिगः चान्हय् मि तयाबिउगु खःसा उकी लानाः फर्निचर, कम्प्युटर व प्रिन्टर नष्ट जूगु दु ।

अथे हे सिन्धुपाल्चोकया मेलम्ची नगरपालिका–१० वडा कार्यालयय् नं अज्ञात पुचलं मि तयाबिउगु दु । उगु ज्याकूया फुक्कं फर्निचर व कम्प्युटर नष्ट जूगु दु । थ्व बम विस्फोट व मिं नःगु घटनायात सुनानं जिम्मा काःगु मदुनि । अथे खःसां थ्व विप्लव पार्टीया हे ज्या जुइमाः धकाः प्रहरीं अनुमान याःगु दु ।