ने. सं. ११४४ कौलाथ्व पारू - नःलास्वनेगु

स्वयम्भू व्यवस्थापन महासमितिया न्हूधाः

येँ(नेपालभाषा टाइम्स)- स्वयम्भू व्यवस्थापन तथा संरक्षण महासमितिया न्हूधाः याःगु दु । महासमितिया नकतिनि क्वचाःगु साधारणसभां न्हूगु ज्यासना पुचः ल्यःगु खः । न्हूधाःकथं महासमितिया न्हूगु ज्यासना पुचलय् भिक्षु धर्ममूर्ति महास्थविरया अध्यक्षताय् न्हूगु ज्यासना पुचः ल्यःगु दु ।

अखिल नेपाल भिक्षु महासंघया पुलांम्ह उपाध्यक्षलिसें अन्तर्राष्ट्रिय बौघ संघसंस्थाया सल्लाहकारतकं जुयाबिज्याःम्ह वसपोलयात निक्वःगु कार्यकालया निंतिं महासमितिया अध्यक्षय् ल्यःगु खः । थुकथं हे महासमितिया उपाध्यक्षय् सुरेशबाबु योञ्जन लामा व योगेश वज्राचार्य, महासचिवय् अशोककाजी बुद्धाचार्य, सचिवय् चन्द्र वज्राचार्य, कोषाध्यक्षय् तेजरत्न ताम्राकार व सह कोषाध्यक्षय् प्रा. डा. केशव श्रेष्ठयात ल्यःगु दुसा दुजलय् राजु लामा व गौतम शाक्ययात ल्यःगु दु ।

विश्व सम्पदाया धलखय् दुथ्यानाच्वंगु धार्मिक सम्पदा स्वयम्भू महाचैत्ययात व्यवस्थित यायेगु व सम्बन्धित निकायलिसे आवश्यक सहकार्य व समन्वय याना वयाच्वंगु दु । महासमितिं नेपाल सरकारया संस्कृति, पर्यटन तथा नागरिक उड्डयन मन्त्रालय, पुरातत्व विभाग, येँ महानगरपालिका लगायतया निकाय व संस्थालिसे समन्वय व सहकार्य यानाः स्वयम्भू महाचैत्यया मर्मत सम्भार व संरक्षण यायेगु नापं आवश्यककथंया गतिविधित न्ह्याका वयाच्वंगु दु ।

नवनिर्वाचित अध्यक्ष भिक्षु धर्ममूर्ति महास्थविरं महासमितिं पुरातत्व विभागलिसे सहकार्य, समन्वय व विभागया निर्देशनय् विश्व सम्पदाया धलखय् दुथ्यााच्वंगु धार्मिक सम्पदाया मर्मत सम्भारलिसें मूर्त व अमूर्त सम्पदाया संरक्षण याना वयाच्वनागु जानकारी बियाबिज्यात । लिसें वसपोलं सकल बौद्ध धर्मावलम्बितय् आस्थाया केन्द्र स्वयम्भूयात पवित्र तीर्थस्थलया विकास यायेगु प्रतिवद्धता नं प्वंकाबिज्याःगु दु ।

महासमितिं स्वयम्भू महाचैत्यय् वइपिं आन्तरिक व बाह्य पर्यटक, धर्मावलम्बियात ऐतिहासिक पक्षया बारे जानकारी बीगु, न्हिथं यायेमाःगु पुजा संचालन यायेगु, सम्पदा संरक्षणलिसें स्वयम्भू जःखःया जंगल क्षेत्रय् वृक्षारोपण व संरक्षण याना वयाच्वंगु दु ।