जुजुधौया सवाः पाना वंगुली बीबीसीया चिउताः
ख्वप- सांस्कृतिक नगरी ख्वपदेय्या छगू म्हसीका जुयाच्वंगु नसा खः जुजु धौ । तर थौंकन्हय् जुजुधौया सवाः पानाच्वंगु खँय् मनूतय्सं चिउताः प्वंकाच्वंगु दु । बीबीसी थेंज्याःगु सञ्चार माध्यमं तकं जुजुधौया सवाः पाना वंगु खँय् चिउताः प्वंकुसें समाचार सम्प्रेषण याःगु दु ।
जुजुधौ धइगु न्हापा न्हापा ततःधंगु भ्वजय् जक प्रयोग याइगु खः । तर थौंकन्हय् दैनिक नये त्वने याइबलय् नं जुजुधौ प्रयोग याना हयेधुंकल । तर थुकिया सवाः धाःसा वंगु छगू दशकया दुने यक्वं पाना वःगु खँ थुकिया पारखीतय्सं धायेगु याना हःगु दु ।
थथे जूगुया कारण धाःसा स्थानीय धौ व्यवसायीतय्सं धौ दयेकेत छ्यलीगु दुरुयात बिउगु दु । थौंकन्हय् धौया माग अप्वयावः थें ख्वपया जक दुरु प्रयोग यानां मगाः । उकिं थुकिया लागिं काभ्रे, पाँचखाल आदि लागां नं दुरु हयेगु याना च्वंगु दु । अनं हइगु म्येय्या दुरुया गुणस्तर धाःसा न्हापा ख्वपं जक काइगु दुरुया गुणस्तर स्वयां यक्वं पाः । न्हापा न्हापा जुजुधौया लागिं हे धकाः दुरु हे बिस्कं उत्पादन याइगु खः । थौंकन्हय् थज्याःगु ज्या मजुइधुंकल ।
म्येय्या दुरुयात ख्वातु मजूतले दायेकाः उकियात सुइ लानातःगु भ्यगतय् तयेगु व उकियात हानं सिलखं त्वपुनाः जुजुधौ दयेकीगु खः । तर थौंकन्हय् म्येय्यात नकीगु नसात्वँसा हे पाः । उकिं उमिसं बीगु दुरुया गुणस्तर नं पाः । गुकिं यानाः न्हापा थें साःगु धौ दयेके फइगु अवस्था मदुगु खँ व्यवसायीतय्सं धायेगु यानाच्वंगु दु । जुजुधौया सवाः पाना वनाच्वंगु कारणं कन्हय् वइगु पुस्तां ख्वपया मौलिक धौ गय् च्वं धकाः धाये मफइगु अवस्था वये फुगु खँ धाःगु दु ।
ख्वपय् थौंकन्हय् न्यागू दर्जन धइथें जुजुधौ जक मीगु पसः चायेका तःगु दु । अन वयाः थौंकन्हय् येँ, यल जक मखु मेमेगु जिल्लायापिंसं तकं धौ कयाः यंकेगु यानाच्वंगु दु । माग अप्वया वःगुलिं थौंकन्हय् ख्वपय् न्ह्यागु धौयात नं जुजुधौ धकाः मीगु नं यानाच्वंगु दु । थुृकिं यानाः नं जुजुधौया प्रतिष्ठा कायम जुइत थाकुइफुगु खँय् नं बीबीसी समाचारं चिउताः प्वंकूगु दु ।
LEAVE YOUR COMMENTS