मेयर साहलिसे वडाध्यक्ष महर्जनया भनाभन
येँ (नेपालभाषा टाइम्स)÷येँया न्हू सतक लागाय् पार्किङ चीकूगु विषययात कयाः म्हिगः च्वंगु मनपा बोर्ड बैठकय् मनपाया मेयर बालेन साह व २२ वडाया अध्यक्ष चिनीकाजी महर्जन दथुइ भनाभन जुल । बैठकय् थीथी विषयय् सहलह जुयाच्वंगु इलय् थःगु थासं न्ववासें २२ वडाया अध्यक्ष महर्जनं येँया पाक्व न्हू सतक लागाय् सुयाकें छुं मन्यँसे पार्किङ चीकूगु गलत जुल धासें थःगु विरोध प्रकट यानादीगु खः ।
लिसलय् मेयर साहं कालोपत्रे जुयाच्वंगु थासय् पार्किङ मयायेगु थःपिनि नीति खः धयादिलसा वडा अध्यक्ष महर्जनं संसारया न्ह्यागु देशय् नं कालोपत्रे जूगु सतकय् पार्किङ यायेगु चलन दुगु खँ स्मरण यानादिल ।
बैठकय् महर्जनयात साथ बिसें एमाले व कांग्रेसया मेपिं वडा अध्यक्षतय्सं नं मेयर साहया कार्यशैली संस्थागत मजुल धासें व्यक्तिगत रुपं छु यल वहे ज्या यानाच्वंगु पाय्छि मजुल धकाः आलोचना याःगु खः । मेयर साहं थौंकन्हय् २२ वडा लगायत मेमेगु वडाय् नं स्थानीय वडा अध्यक्ष व स्थानीय जनतायात छुं जानकारी मयासे यकःति रूपं ज्या यानाच्वन धकाः असन्तुष्टि प्वंकूगु खः ।
अन्तिमय् पार्किङ समस्या बारे थःगु खँ तसें मेयर साहं अथे खःसा गन गन वडाय् पार्किङया सुविधा माःगु खः उकिया प्रस्ताव दयेकाः छ्वया हजि, वयां लिपा माःगु कथं पलाः न्ह्याके धकाः बचं बियादिल ।
लुमंकेबहः जू, पाक्व लागाय् पार्किङ चीकूगु खँयात कयाः स्थानीय जनता व व्यवसायीत आन्दोलित जुयाच्वंगु दु ।
LEAVE YOUR COMMENTS