पाण्डवं दुर्योधनयात मुक्त याःगु प्रसंग

#कल्याण मित्र

महाभारतय् थीथी कथंया ल्वापुख्यापु दुगु ला स्वाभाविक हे खः । उकी मध्ये नं थःत अतिकं दुःख बियाच्वंम्ह दुर्योधनयात पाण्डवं तःधंगु आपदं मुक्त यानाबिउगु छगू प्रसंग थन न्ह्यब्वयेगु कुतः यानाच्वना । दुर्योधन गुलि तक दुष्टम्ह व धूर्तम्ह धकाः ला सकस्यां सिउगु हे खँ खः । धाथें धायेगु खःसा दुर्योधन धयाम्ह जन्मजात हे दुष्टम्ह खः ।

वयागु दुष्टता व धूर्तता सुनानं मसिउगु मखु । थःगु स्वार्थया लागिं दुर्योधन न्ह्याथेंज्याःगु ज्या यायेत नं लिफः मस्वइम्ह खः । छक्वः वं कर्ण, सकुनि व दुशासन नापं ब्वनाः सा निरीक्षणया त्वह तयाः द्वैत वनय् वन । दुर्योधन पाण्डवयात दुःख बिइगु व फयांफक्व सास्ति यायेगु तातुनाः द्वैत वनय् वंगु जुयाच्वन ।

पाण्डवत द्वैत वनय् वनवासया ई छ्यायेत च्वनाच्वंगु जुयाच्वन । व हे इलय् युधिष्ठिरं यज्ञ यानाच्वंगु जुयाच्वन । द्यःपिनि जुजु इन्द्रयात छु ताल धाःसा दुर्योधन अथें द्वैत वनय् वंगु मखु । दुर्योधनया गतिलाःगु मति मदु । वयागु चालढाल ठीक मजू । व बांमलाःगु खराब नियतं वनाच्वंगु खः धयागु शंका इन्द्र्रं यात ।

अले इन्द्रं दुर्योधनयात ठीक यायेमाल धकाः चित्रसेन नांयाम्ह सेवक गन्धर्वयात उजं बिल, ‘हुँ व दुष्ट दुर्योधनयात पाता कसे यानाः थन ब्वनाहिँ ।’इन्द्रया आज्ञा दयेवं चित्रसेन सैनिकत ब्वनाः द्वैत वनय् दुर्योधनयात माःवन । दुर्योधन नाप कर्ण, दुशासन व सकुनि थेंज्याःपिं महायोद्धा व वीर सैनिकत नं दुगु जुयाच्वन ।

सैनिकत नं यक्व हे दुगु जुयाच्वन । थथे जूगुलिं दुर्योधन चित्रसेन खनाः ग्यायेमाःगु छुं कारण मदुगु खः । चित्रेसनया हाँकया प्रतिकार यायेत व युद्ध यायेत नं दुर्योधन तयार जुल । निगू पक्षया दथुइ घमासान युद्ध जुल । अतिकं पराक्रमी चित्रसेनं दुर्योधनयात बुकाबिल । अले चित्रसेनं दुर्योधन व वया पासापिं नापं सकसितं पाता कसे याना यंकल ।

दुर्योधनया बुराम्ह मन्त्री छम्ह धाःसा गुगुं तवरं थःगु ज्यान बचे यानाः बिसिउँ वंगु जुयाच्वन । अन सतिकं पाण्डवत दु धयागु खँ सिइकाः मामां व मन्त्री अन थ्यंकःवन । वं युधिष्ठिरयात दक्व हालखबर कनाः बिन्तिभाव यानाः धाल, ‘प्रभु दुर्योधन दुष्ट जूसां व छिम्ह हे किजा खः । छःपिं इन्द्रनाप हे ल्वायेफुपिं खः ।

छःपिंके उलिमछि शक्ति दु, सामथ्र्य दु । छःपिंसं चित्रसेनया ल्हातिं दुर्योधनयात मुक्त यानाबिज्याहुँ । छःपिंसं मत्वःतुकूसा छगू कलंक छःपिंत हे लाइगु जुइ । शक्तिशाली जुयाः नं पाण्डवं थःगु हे कूलयाम्ह दुर्योधनयात आपद् जूगु इलय् वास्ता मयाः, तमासा स्वयाच्वन धकाः लोकं धाइ । लोकलाजया निंतिंसां छःपिंसं दुर्योधनयात मुक्त यायेमाल ।

थुकिं छःपिनिगु हे यश कीर्ति अप्वइगु खः ।युधिष्ठिर नं ज्ञां दुम्ह हे खः । धर्म कर्म ज्ञान गुणया खँ दक्व सिउम्ह हे खः । युधिष्ठिरयात धर्मराजया हे रुप खः नं धाइ । थ्व खँ न्यनेवं युधिष्ठिर अथें सुम्क च्वने मफुत । वं थः किजापिंत उघ्रिमय् सःताः दुर्योधनया मन्त्रीं हःगु खबर दक्व न्यंकल ।

अले युधिष्ठिरं दुर्योधनया रक्षा यायेत शस्त्र अस्त्र कयाः तुरुन्त वनेत उजं बियाः चित्रसेनया ल्हातिं दुर्योधनयात मुक्त यायेमाल धाल । वया मंत्री झीगु शरणय् वःगुलिं शरणया मरण याये मजिउ, शरणय् वःम्हयात रक्षा यायेगु व वयागु इनापयात पूवंकेगु झीगु कर्तव्य खः । शत्रुया रक्षा यायेगु नं तःधंगु महिमा दु ।

शत्रुया रक्षा यायेबलय् राज्य प्राप्ति, पुत्र प्राप्ति व धनधान्य ऐश्वर्य नं प्राप्ति जुइ । जिं यज्ञ याना मच्वनागु खःसा जि थः हे वनेगु खः । तुरुन्त वनाः दुर्योधनयात चित्रसेनया ल्हातिं मुक्त या धकाः उजंबिल । भिमं दुर्योधनया दुष्टताबारे छुं धाये त्यंबलय् युधिष्ठिरं पनाबिल । न्हापां चित्रसेन गन्धर्वयात सम्झे यायेमाःगु व सम्झे यानाः नं मानेमजूसा थःगु बल व पराक्रमं दुर्योधनयात मुक्त यायेमाःगु खँ नं युधिष्ठिरं सम्झे यात ।

थथे युधिष्ठिरं आज्ञा याःगुलिं भीम, अर्जुन, नकुल व सहदेव थः दाजुया आज्ञा पालना यायेत वन । सम्झे बुझे यानाः माने मजूसा व चित्रसेन गन्धर्वया हि बाः वयेकेगु प्रतिज्ञा अर्जुनं यात । अर्जुनया प्रतीज्ञा न्यनाः दुर्योधनया व बुराम्ह मन्त्रीं सन्तोषया सासः ल्हाइ । दुर्योधन मुक्त जुइगु आशां वयागु मनय् स्वां ह्वइ ।

अर्जुनया प्रतीज्ञा गुलि स्येल्लाः धयागु खँ अले वयागु शक्ति व सामथ्र्य गुलि दु धयागु खँ वं थूगु जुयाच्वन । प्यम्हं किजापिं दुर्योधनया मुक्तिया लागि वन । चित्रसेनयात नापलायेवं अर्जुनं वयात सम्झे बुझे यानाः दुर्योधनयात त्वःतकेगु कुतः यात । तर चित्रसेनं अर्जुनया छगू हे खँ मन्यं । अले वाध्य जुयाः अर्जुनं चित्रसेननाप युद्ध याइ ।

अर्जुनया पराक्रमया न्ह्यःने चित्रसेनया छुं हे सीप लगे मजुयाः युद्धय् पराजित जुइ । अन्तिमय् अर्जुनपाखें पराजित जूम्ह चित्रसेनं थःगु म्हसीका बियाः दुर्योधनयात बन्दि याये माःगु कारण इन्द्रया इच्छां खः धयागु खँ नं अवगत याइ । थ्व खँ न्यनाः प्यम्हं किजापिं अजू चाइ । उमिसं दुर्योधन व चित्रसेन निम्हेसितं युधिष्ठिरयाथाय् यंकी ।

युधिष्ठिरं दुर्योधनया दक्व खँ न्यन । थःपिंत दुःख कष्ट बीत हे दुर्योधन वःगु जुयाच्वन धयागु खँ वयात स्पष्ट जुल । अय्नं स्नेहपूर्वक वं दुर्योधन व वया पासापिंत मुक्त यानाबी । अले छेय्ँ हुँ धकाः ब्वहलय् ल्हातिं थियाः धाइ । थथे यानाः युधिष्ठिरं दुर्योधनयात लज्जित जुइगुपाखें बचे यानाछ्वइ ।

सम्बन्धित बुखँ

LEAVE YOUR COMMENTS