सरकार – विप्लव दुनें दुनें वाता
येँ – सरकार व विप्लवया पुचः दथुइ अनौपचारिक सहलह जुयाच्वंगु खँ सीदुगु दु । सरकारं विप्लव पुचःलिसे वार्ता यायेगु निंतिं छुं पुचः गठन मयाःसां नेकपाया अध्यक्ष लिसे प्रधानमन्त्री केपी ओली व मेम्ह अध्यक्ष पुष्पकमल दाहालं थःथःगु लाइनपाखें वार्ता याका तःगु खँ सीदुगु दु ।
प्रम ओलीं न्हापा थीथी गतिविधि याना वयाच्वंगु पुचःलिसे वार्ता यायेत नीस्वंगु पुचःया संयोजक सोमप्रसाद पाण्डेयात हे विप्लव पुचःलिसे वार्ता याका तःगु दुसा मेम्ह अध्यक्ष दाहालं जनार्दन शर्मायात खटे यानातःगु दु ।
पाण्डे न्हापा संयोजक जुयाच्वंगु इलय् नं विप्लव पुचःया कार्यकर्तालिसे सतिक च्वनाः खल्हाबल्हा यायेधुंकूगु जूगुलिं प्रमं पाण्डेयात खटे यानातःगु खःसा दाहालं विप्लव पुचः बारे नरम विचाः तइम्ह जूगुलिं शर्मायात खटे याःगु खँ सूत्रं धाःगु दु ।
पाण्डें विप्लव पुचःया शीर्ष नेतात नापलाये फयाच्वंगु मदुसा शर्मां धाःसा अनौपचारिक सहलह यायेधुंकूगुलिं याकनं औपचारिक वार्ता शुरु जुइ फइगु खँ धाःगु दु । थ्व स्वयां न्ह्यः नं शर्मां सरकार व विप्लव दथुइ वार्ता याकेत थम्हं भूमिका म्हितेफु धया वयाच्वंगु खः ।
मेखे शर्मा लिसे वार्ता यानाच्वंगु विप्लव पुचःया नेतृत्वं धाःसा दकलय् न्हापां पार्टीयात तयातःगु प्रतिबन्ध चीकेमाःगु माग यानाच्वंगु खँ सीदुगु दु । वार्ताया वातावरण दयेकेगु निंतिं नं प्रतिबन्ध चीकेमाःगु माग विप्लव पुचलं यानाच्वंगु दु । लिसें विप्लव पुचलं वार्ताया वातावरण दयेकेगु निंतिं ज्वनातःपिं थः कार्यकर्तायात त्वःतेमाःगु माग नं याना वयाच्वंगु दु ।
LEAVE YOUR COMMENTS