मरुसतः पुनर्निर्माणय् ५० प्रतिशत ज्या सिधल

येँ – पुनर्निर्माण जुयाच्वंगु मरुसतःया ज्या आः तक ५० प्रतिशत सिधःगु दु । मरुसतः पुनर्निर्माण बारे आः तक जुयाच्वंगु ज्याखँयात कयाः म्हिगः जूगु सार्वजनिक सुनुवाई ज्याझ्वलय् न्ववासें काष्ठमण्डप पुन–र्निर्माण समितिया नायः लिसें प्रदेश ३ या सांसद राजेश शाक्यं थ्व जानकारी बियादीगु खः ।

ज्याझ्वलय् न्ववासें प्राडा शुदर्शनराज तिवारीं मरुसतः दयेकेगु ज्याय् सामग्री जक मखु प्रविधि तकं पुलांगु हे छ्यला–च्वंगु खँ कनादिल । मरुसतलय् न्यागूगू शताब्दीया छगः सिँ नं प्रयोग जुयाच्वंगु खँ कँसें वय्कलं उलि पुलांगु सिँ प्रयोग यानाः दयेकातःगु सम्पदा विश्वय् हे थ्वहे छगू जक जुइमाः धइगु दावी नं यानादिल ।

पुरातत्व विभाग हनुमानध्वाखाया प्रमुख अरुणा नकर्मीं मरुसतः गुगु विधिपाखें दयेकाच्वंगु खः थ्वहे विधिं आः मेमेगु सम्पदा नं निर्माण यायेमाःगु बिचाः तयादिल । येँया सांसद कृष्णगोपाल श्रेष्ठं मरुसतः दयेकेगु लागिं छुं नं कथंया ग्वाहालि माःसा थम्हं याना बीगु बचं अन बियादिल ।

सुनुवाई ज्याझ्वलय् आपालं स्थानीय मनूतय्सं ब्वति काःगु खःसा अन पिदंगु न्ह्यसःया लिसः नं पुनर्निर्माण समितिया नायः शाक्यं बियादीगु खः ।

अन पिदंगु जिज्ञासाया लिसः बिसें वय्कलं मरुसतः स्वदँया दुने दयेके सिधयेकेमाः धकाः सरकारं ई बियातःगु जुयाः थःपिंसं व स्वयां नं न्ह्यः दयेके सिधयेकेगु ग्वसाः यानाच्वनागु जानकारी नं अन बियादिल । मरुसतः दयेकेगु लागिं आः सुदूर पश्चिम प्रदेशया शुक्लाफाँटाया सिमा पालेगु लागिं स्वीकृति कायेधुनागु जुयाः आः अनं हे सिँ वइगु खँ कनादिल ।