दलितया विषययात संचारय् थाय् बीत जोड

येँ- दलित समुदायया विषययात नं संचारमाध्यमं थाय् बीमाःगु सरोकारवालातय्सं माग याःगु दु । दलित समुदायया विषय घटना जुइधुंकाः जक ल्ह्वनेगु मखसे खोज पत्रकारिताया माध्यमं संचार माध्यमं दलित समुदायया विषययात थाय् बीत माग याःगु दु ।

पे्रस काउन्सिल नेपाल व क्रियाशील दलित पत्रकार संघं ग्वसाः ग्वःगु ‘संचारमाध्यमय् दलित समुदायया मुद्दा’ विषयय् जूगु अन्तरक्रियाय् नवासें काउन्सिलया अध्यक्ष बालकृष्ण बस्नेतं दलित समुदाययात नं संचारमाध्यमय् थाय् बीमाःगु खँय् बः बियादिल ।

वय्कलं दलित समुदायया एजेन्डा गुगुं नं घटना जुइधुंकाः जक मखसे मात्तुमालाः संचारमाध्यमं थाय् बीमाःगु खँय् बः बियादिल । दलित समुदायया मुद्दा साझा मुद्दा खः धासें थुकी काउन्सिलं समुदाय व संचारमाध्यमयात सचेत याना वनेगु जुइ धयादिल ।
नेपाल पत्रकार महासंघया अध्यक्ष विपुल पोखरेलं दलित समुदायया उत्थानलिसें समुदायया समस्याया पहिचान यानाः संचारमाध्यम व पत्रकारं ज्या यायेमाः धयादिल ।

न्युनतम पारिश्रमिक निर्धारण समितिया अध्यक्ष संगीता खड्कां दलित समुदायया मुद्दायात संचारमाध्यमं निरन्तर रुपं थाय् बीमाःगु खँय् बः बियादिसें पत्रकारया न्युनतम पारिश्रमिकया विषयय् समिति गम्भिर दु धयादिल ।
ज्याझ्वलय् क्रियाशील दलित पत्रकार संघया अध्यक्ष पवित्रा सुनार, नेपाल पे्रस डटकमया प्रधानसम्पादक मातृका पौडेल, नेपाल टेलिभिजनया नीरज साउद लगायतया पत्रकारतय्सं दलितया मुद्दायात संचारमाध्यमं प्राथमिकता बीमाःगु खँय् बः बियादिल ।