कोरोना साउनय् पिक, फागुनय् नियन्त्रण : प्रम

येँ – प्रधानमन्त्री केपी ओलीं कोरोना भाइरसया संक्रमण फागुनय् जक नियन्त्रणय् वइगु खँ धयादीगु दु । राष्ट्रिय सभाय् संविधान संशोधन विधेयक पारित च्वंगु बैठकय् संवोधन यासें प्रधानमन्त्री ओलीं थ्व खँ धयादीगु खः । अथेहे वइगु साउनया लिपांगु वाः पाखें नेपालय् उच्च रुपं (पिक काइगु) कोरोना खनेदइगु नं वय्कःया विश्लेषण दु । अथेहे वय्कलं मोहनी स्वन्ति, छठ थेंज्याःगु नखःया कारणं हाकनं संक्रमण अप्वइगु अवस्था नं वयेफुगु खँ धयादीगु दु । वय्कलं धयादीगु दु, ‘मोहनि, स्वन्ति, छठ थेंज्याःगु नखः वयेत्यंगु दु । थज्याःगु नखः न्ह्याब्लें न्ह्याइपुसे हे च्वनी । थ्व पालय् हाकनं संक्रमण अप्वयेकी ला धयागु अवस्था दु । यदि थुकिं झीगु ग्राफ थकयाबिल धाःसा कुहां वनाच्वंगु ग्राफयात मंसिरय्हा कनं च्वय्पाखे थछ्वयाबीफु ।’

मंसिरं थहांवंसां हाकनं मंसिरया अन्तपाखे कुहां वनेगु सुरु जुयाः फागुन तकया दुने नियन्त्रणय् वइगु वय्कःया धापू दु । तर थुकिया निंतिं संक्रमिततय्त सहज रुपं वये-वने याके मजिउगु व पिनें वइपिंत क्वारेन्टिनय् तयेमाःगु खँ नं धयादीगु दु ।

थ्व झ्वलय् वय्कलं नेपाःमितय्के ल्वय् लिसे ल्वायेगु क्षमता (प्रतिरोध क्षमता) बांलाःगुलिं नं नेपालय् कोरोनां सीपिनि ल्याः म्हो जूगु खँ नं धयादीगु दु ।