बेलायतया पेट्रोल पम्पय् सेना परिचालन यायेगु तयारी

एजेन्सी- बेलायतय् पेट्रोलया अभावं यानाः पेट्रोल पम्पय् ताःहाकःगु झ्वः खनेदयाच्वंगु दु । पेट्रोलया अभावं यानाः यक्व हे पेट्रोल पम्प बन्द जूगु दु । बेलायतय् जुयाच्वंगु पेट्रोलया अभाव सहज यायेगु निंतिं बेलायत सरकारं सेनाया परिचालन यायेत्यंगु दु ।

बेलायतया सरकारं माःमाःगु थासय् सेनाया ट्याङ्कर छ्यलेगु व उकिया निंतिं सेनाया ट्याङ्कर चालकतय्त तालिम बिइगु धाःगु दु । सरकारं पेट्रोल ल्ह्ययेत १५० गः सेनाया ट्याङ्कर छ्यलेत्यंगु दु । वंगु प्यन्हु न्ह्यवंनिसें बेलायतय् पेट्रोलया अभाव खनेदयाच्वंगु दु ।

बेलायतया व्यापारमन्त्री कोर्टनं सेना परिचालन यानाः पेट्रोल आपुर्ति सहज यायेगु ‘समझदारी व सावधानी पलाः’ जूगु धाःगु दु । व्यापारमन्त्री कोर्टनं बेलायतयाके माक्व चिकं दुगु नं धाःगु दु । बेलायतया थीथी मन्त्रीतय्सं नं मनूतय्सं म्वाःसां म्वाःसां पेट्रोल मुंकाच्वंगुलिं थथे अभाव जूगु खः धकाः द्वपं बिउगु दु । बेलायतया तःतःधंगु चिकं कम्पनीतय्सं नं बेलायतय् चिकंया अभाव मदुगु धयाच्वंगु दु ।

बेलायतय् लरी चालकतय्गु अभावया कारणं पेट्रोेलियम पदार्थया आपूर्ति प्रभावित जुइगु खनेदुगुलिं मनूतय्सं पेट्रोल मुंकाच्वंगु खः । बेलायत सरकारं लरी चालकतय्गु अभावया म्हो यायेत विदेशी एचजीभी चालकतय्त स्वलाया निंतिं अस्थायी प्रवेशाज्ञा बीत सहमत जुइधुंकूगु दु ।

सम्बन्धित बुखँ

LEAVE YOUR COMMENTS