ने. सं. ११४३ ञलागा चौथी -

येँ महानगरपाखें आतकया खोप ज्याझ्वःयात कयाः समीक्षा

येँ- येँ महानगरपालिकां कोरोना भाइरस (कोभिड–१९) विरुद्ध संचालन याःगु आतकया खोप ज्याझ्वःयात कयाः समीक्षा याःगु दु । येँ महानगरपालिका जनस्वास्थ्य विभागं कोभिड १९ विरुद्धया खोप ज्याझ्वःयात कयाः समीक्षा याःगु खः ।

विभागं खोप ज्याझ्वःयात कयाः समीक्षा यायेगु झ्वलय् स्वनिगःया दक्वं थासय् छगू हे इलय् खोप ज्याझ्वः न्ह्याकेमाःगु निष्कर्ष पिकाःगु दु । स्वनिगःया स्वंगुलिं जिल्लाय् छगू हे इलय् कोरोना विरुद्धया खोप ज्याझ्वः संचालन मजूगुलिं न्हापां संचालन याःगु जिल्लाय् खोप कायेत वइपिंत व्यवस्थापन यायेत तसकं थाकूगु बैठकया निष्कर्ष दु ।

पालिकास्तरय् योजना निर्माण यानाः खोप बीगु व्यवस्था याके मबिसे च्वय्या निकायपाखें मिति व ई क्वःछिनाः खोप बीत निर्देशन बीवं उकिं यानाः खोप ज्याझ्वःयात प्रभावकारी याये मफुगु बैठकय् सहभागितय्सं धाःगु दु । खोपया अभाव, खोप बीकेत दबाव, माग व आपूर्तिया सन्तुलन मिले मजूगुलिं सुरक्षा खतराया तकं अवस्था ब्वलंगु खँय् नं बैठकय् सहलह जूगु खः ।

अत्यावश्यक सेवा व अग्रपंक्तिइ खटे जुइपिंत खोप बीमाः खःसां म्हो उमेरयापिं नं खोप कायेत वःगु, क्वःछिनातःगु उमेरयापिंसं खोप काये मखंगु, खोप कायेत न्हिछितक लाइनय् च्वनाः नं खोप काये मखंगु लगायत अनेक समस्यायात कयाः बैठकय् व्यापक सहलह जूगु खः ।

गुलिखे खोप केन्द्रय् गुलि मात्राया खोप वइगु खः धइगु बारे न्हापा हे यकीन मजूगुलिं क्वःछिनातःगु ई स्वयां न्ह्यः हे खोप ज्याझ्वः बन्द यायेमाःगु अवस्था तकं वःगु खः । थुकिं यानाः खोप काये दइगु आशां न्हिछितक लाइनय् च्वंपिनि दथुइ निराशा जक मखु आक्रोशतकं ब्वलंगु खः ।

आवंलि नागरिकं इच्छा याःगु खोप ज्याझ्वः संचालन यायेत दक्वं स्थानीय तहया खोप समन्वय समितितय्गु भूमिकायात स्वीकार यायेमाःगु व आः वयाः पालिका व वडास्तरय् समन्वय समितिया भूमिकायात तकं निष्क्रिय यायेत स्वयाच्वंगु बैठकय् सहभागितय्सं धाःगु दु ।

बैठकय् जिल्ला समन्वय समिति येँया प्रमुख शिवसुन्दर राजवैद्य, जिल्ला समन्वय अधिकारी पिताम्बर अधिकारी, विभागया अधिकारी व खोप कार्यक्रमया संयोजकत सहभागि जुयादीगु खः ।

बैठकय् नवासें येँ जिसस प्रमुख राजवैद्यं पालिकां हे योजना दयेकाः पालिकां हे खोप ज्याझ्वः संचालन यायेमाःगु खँय् बः बियादिल । खोपया विषयय् स्वयम जनप्रतिनिधि हे बेखबर थें जुयाच्वनेमाःगु विडम्बना जूगु वय्कःया धापू दु ।

येँ महानगर जनस्वास्थ्य विभागया प्रमुख हरिबहादुर कुँवरं खोप ज्याझ्वः संचालनया निंतिं योजना दयेकेत तकं ई मदुगु खँ धयादिल । खोप ज्याझ्वः संचालन जुइगु दिंकुन्हु हे नं इलय् थःपिंत आवश्यक हलंज्वलं नं प्राप्त मजूगु वय्कलं धयादिल ।

थ्व स्वयां न्ह्यः महानगरं खोप ज्याझ्वः संचालन यानाच्वंगु इलय् दथुइ हे दिकेमाःगु अवस्थातकं वयेवं आवंलि अज्याःगु घटना दोहोरे मजुइमा धइगु खँय् नं ध्यान बीत सरोकारवालातय्सं धाःगु दु ।