नेकपां ७७ जिल्लाया इन्चार्ज ल्यल, जिम्मेबारी बीत अझं सकस
येँ – एमाले व माओवादी एकीकरण जुइधुंकाः ल्यं दुगु ज्या कथं नेपाल कम्युनिष्ट पार्टीं देय्या ७७ गुलिं जिल्ला व खुगू महानगरपालिकाया पार्टी इन्चार्ज व सहइन्चार्च तोके याःसां नेतातय्त जिम्मेवारी बीगु ज्या धाःसा अझं याये फुगु मदुनि । इन्चार्ज ल्ययेगु ज्या आइतवाः सिधयेकूगु खःसां जिम्मेवारी बीगु ज्या धाःसा याये मफयाः थौं मंगलवाः हानं बैठक च्वनीगु खँ धाःगु दु ।
नेतातय्सं सु नेतायात छु जिम्मेवारी बीगु धकाः खाका तयार याःसां बैठकय् धाःसा उकियात प्रस्तुत याःगु मदुनि । सम्भवतः थौं थ्व खाका प्रस्तुत याये फइगु खँ धाःगु दु । नेकपापाखें देय्या खुगू महानगर– पालिकातय्त नं जिल्लाया मान्यता बियाः इन्चार्ज तोके याःगु खः । थ्व इन्चार्ज ताके याः कथं येँ महानगर–पालिकाया इन्चार्ज कथं सांसद जीवनराम श्रेष्ठयात ल्यःगु दु ।
अथेहे येँ जिल्लाया इन्चार्जय् साबित्रा भुषालयात हःगु दुसा सहइन्चार्ज धाःसा न्हय्म्ह तःगु दु । उकी अन्जना बिशंखे, कुमार पौडेल, दिलीप महर्जन, नारायण सिलवाल, पार्वती थापा, बसन्त मानन्धर, मुक्ति प्रधान, रामेश्वर फुयाल व सुरेन्द्र मानन्धर च्वनादीगु दु । यल मनपाया इन्चार्ज सुशीला नेपाल जुयादगिु दुसा यल जिल्लाया इन्चार्ज हरि दहाल व सहइन्चार्ज प्रमेश हमाल च्वनादीगु दु ।
उकथं हे ख्वप जिल्लाया इन्चार्जय् दिलीप कुमार प्रजापति व सह इन्चार्जय् सोमप्रसाद मिश्रयात हःगु दु । ख्वप नगरपालिकायाया इन्चार्जय् धाःसा रेणु दहाल च्वनादीगु दु ।
‘विप्लवलिसे वार्ता जुइ मखुनि’
येँ – विप्लव माओवादीं हिंसात्मक गतिविधि मत्वःतूतले व लिसे वार्ता याये मफइगु खँ रक्षा मन्त्री ईश्वर पोखरेलं कनादीगु दु । विराटनगर विमानस्थलय् स्थानीय पत्रकारलिसे खँ ल्हायेगु झ्वलय् रक्षामन्त्री पोखरेलं वार्ताया नितिं हतियार व हिंसात्मक गतिविधि त्याग यायेमाःगु खँ धयादीगु दु ।
वय्कलं धयादी, ‘विप्लव पुचलं हिंसात्मक गतिविधियात निरन्तरता बिया वयाच्वंगु दु । थज्याःगु अवस्थाय् वार्ता जुइगु छुं सम्भावना मदु ।’
सरकारं थीथी राजनीतिक पुचःलिसे वार्ता यायेत दयेकूगु पुचलं औपचारिक खँल्हाबल्हा याःगु खःसां नं उकिया बारे सरकारयात जानकारी मदुगु खँ नं वय्कलं धयादीगु दु ।
सरकारं हे वार्ता पुचः दयेकूगु समाचार थःपिंसं नं ब्वनागु खँ धासें रक्षामन्त्री पोखरेलं उकियात थःपिंसं न्ह्यइपुगु कथं जक कयागु खँ नं धयादीगु दु ।
LEAVE YOUR COMMENTS