आदर्श आजादया न्हूगु भवन

ख्वप (नेपालभाषा टाइम्स) – थनया आदर्श आजाद माध्यमिक विद्यालयया न्हूगु भवन निर्माणया ज्या शुरु जूगु दु। थनया भेलुख्यलय् च्वंगु विद्यालयया न्हूगु भवन निर्माणया निंतिं हालय् जक शिला न्यास यायेगु ज्या जुल ।

विद्यालय व्यवस्थापन समितिया अध्यक्ष विश्वराम कवां न्हूगु विद्यालय भवन निर्माणया निंतिं शिलान्यास यानादीगु खः । २०७२ साल बैशाख १२ गतेया तःभुखाचं क्षति जूगु विद्यालयया न्हूगु भवन निर्माणया निंतिं ताःई न्ह्यःनिसें पहल जुयाच्वंगु खः । उगु विद्यालयया न्हूगु भवन नेपाल सरकारया निगू करोड ग्वीन्हय्गू लाख ख्वीखुद्वः व २५५ तका दां लागतय् निर्माण यायेत्यंगु खः । विद्यालय भवन निर्माणया ज्या राष्ट्रिय पुनःनिर्माण प्राधिकरण, जिल्ला आयोजना कार्यान्वयन इकाइ (शिक्षा) ख्वपं याःगु खः ।

विद्यालयया सहायक प्रधानाध्यापक चक्रबहादुर चाकतुं विद्यालय भवनया भौतिक निर्माणलिसें रंगरोगन व कक्षा क्वथाया बेन्च, टेबुललिसें आवश्यक भौतिक सामग्री नं आयोजनां हे तयाबीगु सम्झौता जूगु जानकारी बियादीगु दु ।