ने. सं. ११४४ ञलाथ्व दशमी -

आः सवारी लाइसेन्स झिदँय् नवीकरण

येँ – सरकारं सवारी चले यायेगु लाइसेन्सया ई न्यादँ अप्वयेका झिदँ याइगु जूगु दु । सरकारं सवारी तथा यातायात व्यवस्था ऐन संशोधन यानाः लाइसेन्सया ई झिदँ यायेत्यंगु खः । यातायात व्यवस्था विभागया कथं यातायातयात सुधार यायेत न्हूगु ऐन हयेत्यनागु खँ धाःगु दु । विभागं सुझाव सहित मस्यौदा दयेकाच्वंगु दु ।

गुकिं लाइसेन्सया ई अप्वयेकाः झिदँया यायेगु सुझाव तयातःगु दु । विभागया कथं लाइसेन्स धइगु तःक्वः नवीकरण यायेगु चीज मखु धासें लाइसेन्स जारी जुइधुंकाः म्होतिं नं झिदँया जुइमाः धइगु बिचाः कथं ऐन संशोधन यायेगु तयारी जुयाच्वंगु खः । विकसित देशय् २० वर्ष स्वयां अप्वः ईया लाइसेन्स जारी जुइगु खँ विभागं धाःगु दु ।

मस्यौदाय् विभागं तग्वःगु गाडी चले याइपिनिगु निंतिं उमेरया हद अप्वयेकेमाःगु प्रस्ताव याःगु दु । प्रचलित ऐन कथं २१ दँ दुम्हेस्यां तग्वःगु गाडी चले यायेदु । सार्वजनिक सवारी साधनया दुर्घटना अपरिपक्व चालकया कारणं अप्वःगु ट्राफिक रिपोर्टं क्यंगुलिं उमेर अप्वयेकेत्यंगु खः । आः सुझाव कथं सार्वजनिक सवारी चले यायेत म्होतिं नं नीन्यादँ दुम्ह जुइमाःगु प्रस्ताव विभागं याःगु दु ।

अथेहे विभागं ‘पठाओ’ व ‘टुटल’ थेंज्याःगु सेवायात नियमन यायेगु निंतिं माःगु व्यवस्था न्हूगु ऐनय् दुथ्याकेत्यंगु दु । विभागं निगुलिं सेवाया निंतिं नं कानुन दयेकेगु तयारी यानाच्वंगु खँ धाःगु दु । थुकिया निंतिं नं विभागं सुझाव दयेकाः मन्त्रालय छ्वयेगु तयारी यानाच्वंगु दु । निगुलिं सेवा आवश्यक जूगुलिं विभागं कानुन दयेकाः नियमन यायेगु तयारी यानाच्वंगु खः ।