कोरानाविरुद्ध खोप हयेत निजी ख्यः न्ह्यःने मवल

येँ (नेपालभाषा टाइम्स)÷सरकारं कोरोना भाइरस विरुद्ध खोप हयेगु निंतिं निजी क्षेत्रयात इनाप याःगु खःसां निजी क्षेत्रं धाःसा खोप हयेगु निंतिं आःतक चिउताः क्यंगु मदु । सरकारं खोप हयेगु निंतिं २०७७ चैत १२ गते सार्वजनिक सुचं जारी यानाः निजी क्षेत्रयात नं खोप हयेत धाःगु खः । तर आःतक छगू नं निजि क्षेत्रं खोप हयेगु निंतिं आवेदन मबिउनिगु खँ औषधी व्यवस्था विभागं धाःगु दु । सरकारं विभागपाखें खोप हयेगु निंतिं सुचं जारी याःगु खः ।

सुनां नं खोप हयेत आवेदन मबीवं सरकारं सोमवाः हाकनं सुचं जारी यानाः निवेदन बीगु ई न्हय्न्हु थप याःगु दु । सुचनय् धयातःगु दु ‘मिति २०७७÷१२÷०२ गते खोप हयेगु निंतिं सुचं जारी यानागु खःसां नं रितपूर्वक आवेदन मवःगुलिं यानाः न्हय्न्हुया ई थप कामय जुइ कथं हाकनं सुचं जारी यानागु व्यहोरा सकसितं जानकारीया निंतिं इनाप दु ।’

सरकारं जःलाखःला देय् चीनं हयेधकाः धाःगु खोप हये फयाच्वंगु मदुनि । खोप मवयेवं आः वया खोप अभियान हे स्थगित जुयाच्वंगु दु । सरकारं माक्व खोप महयेवं न्हापा छगू डोज खोप कायेधुंकूपिनिगु नं आः छु जुइ धयागु न्ह्यसः ब्वलनाच्वंगु दु ।

नेपालय् आः तक भारत सरकारं अनुदानय् बिउगु १० लाख, सरकारं न्यानाहःगु १० लाख व कोभ्याक्स कार्यक्रमपाखे वःगु ३ लाख ४८ हजार यानाः मुक्कं २३ लाख ४८ हजार डोज कोभिडया खोप वयेधुंकूगु दु ।

थ्वहे झ्वलय् भारतय् कोरोना भाइरसया संक्रमितत अप्वया वनेवं सरकारं भारत लिसें सीमा स्वाःगु नाकाय् कडाइ याःगु दु । भारतया महाराष्ट्र, मध्यप्रदेश, गुजरात, तमिलनाडु, पञ्जाव, दिल्ली, कर्नाटक, हरियाना राज्यय् थौंकन्हय् न्हियान्हिथं कोरोना संक्रमितया ल्याः अप्वया वनाच्वंगु दु । भारतय् कोरोना संक्रमित अप्वयेवं सरकारं भारत लिसे स्वाःगु नाकाया झिंप्यंगू हेल्प डेक्सयात सक्रिय याःगु खँ इपिडिमियोलेजी तथा रोग नियन्त्रण महाशाखां धाःगु दु । डेक्सपाखें नेपाः दुहां वइपिनिगु तथ्यांक कायेगुया लिसें संक्रमित जूपिं लुत धाःसा उमित क्वारेन्टाइनय् तयेगु व्यवस्था नं यानागु खँ महाशाखां धाःगु दु ।

उकथं हे महाशाखां भारत जुयाः नेपाः वइपिंत झिन्हु तक क्वारेन्टाइनय् तयेत नं स्थानीय निकाययात निर्देशन बिउगु दु । भारतया थीथी राज्यय् कोरोना संक्रमण अप्वयेवं उकिया लिच्वः नेपालय् लाइगु धासें महाशाखां जनस्वास्थ्य मापदण्ड कडा यायेमाःगु खँ धाःगु दु ।

सम्बन्धित बुखँ

LEAVE YOUR COMMENTS