गुथि विधेयक लित काःगुलिं रोहित असन्तुष्ट

ख्वप – गुथि विधेयकयात सरकारं लित काःगु खँय् नेपाल मजदुर किसान पार्टीया अध्यक्ष नारायणमान बिजुक्छेँ रोहितं असन्तुष्टि प्वंकादीगु दु ।

गुथि व मोहियानी हक बारे पार्टीया अवधारणा न्ह्यब्वयादिसें रोहितं ह्याउँमचायाके मचा प्वाथय् च्वंबलय्या च्या चि सी दइथें पंचायती व्यवस्थां स्वीदँ तक शासन यानातःगु प्रजातान्त्रिक मुलुक नेपालय् पंचायती भूत कथं खने दयाच्वंगु सामन्तवादया अवशेष वर्तमान इलय् छुं छुं खने दुगुलिं सामन्ती व सन्तमहन्ततय्गु दवाबय् सरकारं गुथि विधेयक लित काःगु द्वपं बियादिल ।

यदि गुथि विधेयक वःगु जूसा ताः ई न्ह्यवंनिसेंया सामन्ती संस्कार व महन्ततय्गु हाली मुहाली अन्त्य जुयाः जमीन जोते यानाच्वंपिसं मोहीयानी हक चूलाके खनीगु प्रशंग कनादिसें वय्कलं ‘सी गुथि मदइगु जुल’ धइगु गलत हल्ला न्यंकाः येँय् नेवाःत थनाः सामन्त व महन्ततय्गु इशाराय् सरकारं विधेयक लित काःगु कन ।

ख्वप नगरपालिकाया न्याक्वःगु परिषद्या उलेज्या यानादिसें मूपाहां रोहितं बजार विकास जूसा हे जक सकसियां उन्नति जुइगु कनादिसें आः न्हापा स्वयां किसानत न्ह्यःने वयेफुगु कारण धइगु हे मोहीयानी हकया सुरक्षा जुयाः जक खः धयादिल । ज्याझ्वलय् सांसद प्रेम सुवालं स्मार्टसिटी व स्याटलाइट सिटी धइगु विदेशी नारा जूगु कँसे खपयात सांस्कृतिक नगर दयेकेत इनाप यानादिल ।