निगू निर्णय यायेत आकस्मिक क्याबिनेट
येँ (नेपालभाषा टाइम्स) – प्रधानमन्त्री केपी शर्मा ओलीं म्हिगः मन्त्रिपरिषद्या आकस्मिक बैठक सःतादिल । नियमित विहीवाः मन्त्रिपरिषद् बैठक च्वनीगु खःसां म्हिगः आइतवाः हे बैठक च्वंगु कारणं छुं विशेष निर्णय जुइगु अनुमान याःगु खः ।
तर बैठकं मुक्कं निगू जक निर्णत यात । बैठकं कृषि अनुसन्धान परिषद् (नार्क) या कार्यकारी निर्देशक पदय् डा. दीपक भण्डारीयात नियुक्त यायेगु निर्णय याःगु खः । अथे हे नेपाः व इजरायल दथुइ कृषि प्रविधि हस्तान्तरण यायेगु सम्बन्धी सम्झौताय् हस्ताक्षर यायेगु अख्तियारी अनया नेपाली राजदूत डा. अन्जान शाक्ययात बीगु निर्णय याःगु खः ।
इजरायलं म्हो जक लः छ्यलाः उत्पादन अप्वयेकेगु कृषि प्रविधिइ यक्व प्रगति याःगु दु। अज्याःगु हे प्रविधि नेपालय् नं हयेगु लागिं राजदूत शाक्यं कुतः यानादीगु खःसा आः उकी हस्ताक्षर यायेगु ज्या जुइत्यंगु खः ।
म्हिगः मन्त्रिपरिषद् बैठक न्ह्यः प्रम ओली व पार्टी अध्यक्ष पुष्पकमल दाहाल दथुइ ताःहाकः वार्ता जूगु खः । मन्त्रिमण्डल पुनर्गठन यायेगु सवालय् धाःसा मन्त्री ल्ययेगु खँय् पार्टीइ विवाद पिहां वःगु खँ सीदुगु दु ।
LEAVE YOUR COMMENTS