लागू वासः विरुद्ध छवाःयंकंया अभियान

येँ – गृह मन्त्रालयं लागू वासः दुरुपयोग सम्बन्धी छवाःयंकंया अभियान शुरु दु । ‘समृद्ध राष्ट्र निर्माणया निंतिं लागू वासःरहित स्वस्थ जीवन’ धइगु नारा बियाः लागू वासःया दुरुपयोग व ओसारपसारसम्बन्धी छवाःयंकंया थ्व अभियान न्ह्याकूगु खः । मन्त्रालयं दँय्दसं न्ह्याका वयाच्वंगु लागू वासः दुरुपयोग सम्बन्धी थ्व अभियान वइगु असार ११ गतेतक न्ह्याइ ।

ज्याझ्वलय् नवासें गृह मन्त्रालयया सचिव प्रेमकुमार राईं नेपालय् दँय्दसं लागू वासःया दुव्र्यसनीतय् ल्याः अप्वया वनाच्वंगु अवस्थाय् थुकथंया अभियानं दुव्यर्सनी न्यूनीकरणया निंतिं आवश्यक भूमिका म्हितीगु विश्वास प्वंकादिल ।

छगू अनुमानित तथ्यांककथं थौंकन्हय् नेपालय् छगूत्या लाख स्वयां अप्वः ल्याय्म्हत लागू वासःया कुलतय् फसे जुयाच्वंगु दुसा थज्याःगु कुलतय् लानाच्वंपिंत नियन्त्रण यायेत अभियानं ग्वाहालि जुइगु वय्कःया धापू दु । ‘लिपांगु छगू सर्वेक्षणकथं नेपालय् दँय्दसं ११.३६ प्रतिशतया ल्याखं लागू वासः प्रयोगकर्तातय् ल्याः अप्वया वनाच्वंगु दु ।

थ्व तथ्यांककथं नेपालय् जुइगु कुल अपराधय् ७ प्रतिशत लागू वासःलिसे सम्बन्धित दु । उकिं थुकियात नियन्त्रण यायेगु झी सकसिगुं दायित्व खः’, वय्कलं धयादिल । मन्त्रालयया सहसचिव नारायणप्रसाद दवाडीं केन्द्र,, प्रदेश व स्थानीय तहं लागू वासः प्रयोगयात पनेगु व थुकियात नियन्त्रण याय्त विशेष अभियान संचालन यायेमाः धयादिल ।

अभियानया संयोजक तकं जुयाच्वनादीम्ह वय्कलं थ्व अभियानया झ्वलय् लागू वासः रोकथाम नीति, मार्गदर्शन तर्जुमा, वैकल्पिक विकास, संचार माध्यमं चेतनामूलक ज्याझ्वः, नियन्त्रणात्मक ज्याझ्वः, नसंचा उलेगु थेंज्याःगु ज्याझ्वः नं न्ह्याकेगु जानकारी बियादिल ।
लागू वासःया दुरुपयोग, रोकथाम व ओसारपसार थेंज्याःगु ज्याय् सुरक्षाया स्वंगुलिं निकायं महत्वपूर्ण भूमिका म्हिता वयाच्वंगु नं ज्याझ्वलय् जानकारी बिउगु खः ।