गुुथि विधेयक विरोधय् अमेरिकाय् प्रदर्शन

येँ – अमेरिकाया टेक्सास राज्यया डलास सहरय् नं गुथि विधेयक विरुद्ध प्रदर्शन जूगु दु । सरकारं संघीय संसदय् हःगु गुथि विधेयक विरुद्ध जूगु प्रदर्शनय् अमेरिकाया डलास सहरय् च्वंपिं सलंसः नेपाःमितय् उपस्थिति दुगु खः ।

प्रस्तावित गुथि विधेयक–२०७५या विरोधय् जूगु प्रदर्शनया निंतिं नेपाली मूलया डलासवासीतय्सं शैलेन्द्र मानन्धर व रवि महर्जनया संयोजकत्वय गठन याःगु ‘मूभमेन्ट अगेएन्स गुथि बिल’ नांया संघर्ष समितिया ग्वसालय् उगु विरोधया ज्याझ्वः याःगु खः । समितिं प्रस्तावित गुथि विधेयक संस्कृति, सम्पदा, समाज, परम्परा, सांस्कृतिक धरोहर, दाताया इच्छा व जनताया इच्छा विरोधी जूगु नं ठहर याःगु दु ।

विरोध ज्याझ्वलय् नवाःपिं वक्तातय्सं विधेयकया घोर विरोध यासें नेपालय् थुगु विधेयक विरुद्ध लगे जुयाच्वनादीपिं सकल दाजुकिजा तःकेहेंपिंत हरेक किसिमं ग्वाहालि उपलब्ध यायेगु व याकेगु प्रतिवद्धता नं प्वंकूगु दु । नेपालय् प्रचलित गुथि सामूहिकताया सफलता व म्वानाच्वंगु इतिहास जूगु धासें गुथिया इतिहास इ.सं. ४६४ स्वयां नं यक्व न्ह्यः शुरु जूगु चाँगुनारायणय् लुया वःगु ल्वहंपती तकं उल्लेख यानातःगु अन जानकारी बिउगु खः ।

नेपालय् प्रचलित गुथिइ आपालं जुजु, वंश व शासन पद्दति हिले धुंकाः नं विगतय निद्वः दँ न्ह्यवंनिसें अनवरत रुपं न्ह्यानाच्वंगु प्रणाली खः ।
थज्याःगु संस्थागत प्रणालीयात छुं राजनीतिक व्यक्तित्वं थःगु स्वार्थ पूर्ति यायेत स्वःगुयात गुगुं नं हालतय् स्वीकार याये मफइगु संघर्ष समितिया संयोजक मानन्धरं धयादिल ।

अथे हे समितिया मेम्ह संयोजक महर्जनं गुथि विना झीगु संस्कृति, जात्रापर्व, बाजं, रीतिथिति, परम्परा तकं संचालन जुइ फइमखु धासें गुथि सम्बन्धी ऐनया आवश्यकता मदुगु खँय् बः बियादिल ।

प्रस्ताविक विधेयकया बुँदा नं. २३ य् न्ह्यथनातःगु गुथिया हक व दायित्व प्राधिकरणय् वनीगु, बुँदा नं. २४ य् न्ह्यथनातःगु गुथियारया हक अधिकार स्वतः अन्त्य जुइगु लगायतया बुँदाय् थःपिनिगु ध्यानाकर्षण जूगु धासें संयोजकद्वयं गुथियार दःसा गुथि दइगु, गुथि दत धाःसा सम्पदा दयाच्वनीगु, सम्पदा दयाच्वन धाःसा संस्कृति, सभ्यता व पहिचान नं ल्यनाच्वनीगु खँय् बः बियादिल ।

नेपालय् संख्यात्मक रुपय् नेवाःत आवद्ध जुयाच्वंगु गुथि आपालं दुसां नं थुगु विधेयकया नकारात्मक लिच्वः गैर नेवाःतय् नं लाइगु खने दुगु सकलें थुकी सचेत जुइत नं इनाप याःगु दु । गैर नेवाःत आवद्ध जुयाच्वंगु छुं गुथि मध्ये स्वर्गद्वारी गुथिया २६०० रोपनी, पाल्पाया अमरनारायण देगःया ४००० रोपनी, पशुपतिया २४० हेक्टर जग्गा लगायत आपालं गुथि दुगु नं ज्याझ्वलय् जानकारी बिउगु खः ।