कन्हय् भेरी बबई आयोजनाया सुरुङ्ग ब्रेकथु्र

येँ – प्रधानमन्त्री केपी ओलीं कन्हय् मंगलवाः राष्ट्रिय गौरवया आयोजना भेरी बबई बहुउद्देशीय डाइभर्सनया सुरुङ्गया ब्रेकथु्र यानादीगु जूगु दु । प्रधानमन्त्री ओली बटन तियाः टिबिएमयात सुरुङ्ग पितहयाः ब्रेकथु्र यानादी । सुरुङ्ग म्हुइगु जिम्मा कयातःगु चिनियाँ कम्पनी चाइना इन्जिनियरिङ्ग ओभरसिज (कोभेकं) टनेल बोरिङ्ग मेसिन (टिबिएम)पाखें सुरुङ्ग म्हूगु खः ।

सम्झौताय् न्ह्यथनातःगु स्वयां दछि न्ह्यव हे सुरुङ्ग दयेकेज्या क्वचाःगु खः । आयोजनाया निर्देशक सञ्जीव बरालं आयोजनाया प्रवेशद्वार भेरीगंगा नगरपालिका ११ या चिप्लेय् मंगलवाः ब्रेकथु्र कार्यक्रम जुइगु खँ कनादीगु दु । बबइ खुसिया सिथं हात्तीखालं १२ किमि २१० मिटर चुरे पवर्त म्हुतयाः मेसिन भेरी किनारया चिप्लेय् थ्यंकःवःगु खः ।

थन २०७४ कात्तिक मसान्तनिसें टिबिएमया ग्वाहालिं सुरुङ्ग म्हुइगु सुरु याःगु खः । नेपालय् न्हापांखुसी टिबिएम मार्फत सुरुङ्ग म्हूगुलिं क्वःछिनातःगु ई स्वयां दछि न्ह्यव हे ज्या क्वचाःगु खः । निर्देशक बरालया कथं नेपालय् न्हापांखुसी अत्याधुनिक प्रविधिं टनेल बोरिङ्ग मेसिन जडान यानाःगु दयेकूगु थ्व नमुना आयोजना खः ।

सुरुङ्ग म्हुतुइ अमेरिकी कम्पनी रोबिन्सं दयेकूगु चालकरहित टिबिएम मेसिन छ्यःगु खः । नेपालय् थ्वयां न्ह्यः ड्रिलिङ्ग व ब्लाष्टिङ्ग पाखें जक सुरुङ्ग म्हुतुइगु चलन दु ।थ्व आयोजनापाखें प्रतिसेकेण्ड ४० घनमिटर भेरी खुसिया लः सुरुङ्गपाखें बबइ खुसिइ कुर्काः मत उत्पादन यायेगु व ५ नं. प्रदेशया बाँके व बर्दियाय् ५१ हेक्टर क्षेत्रफल बुँइ सिँचाइ सुविधा थ्यंकेगु लक्ष्य दु ।

सुरुङ्ग म्हुइगु चुनौतीपूर्ण ज्या क्वचाःसां आयोजनाया मेमेगु पूर्वाधार दयेकेगु ज्या धाःसा ल्यं दनि । मत उत्पादनया निसें सिँचाइया निंतिं लः कुर्कुेत ब्यारेज दयेकेगु ज्या नकतिनि सुरु जूगु दु । निर्देशक बरालया कथं चिप्लेय् ६ गेजया ११५ मिटर ताःहाकःगु १४ मिटर तजाःगु ब्यारेज दयेकी । थ्व आयोजना पाखें ४६.८ मेगावाट मत उत्पादन यायेगु लक्ष्य तयातःगु दु ।

सम्बन्धित बुखँ

LEAVE YOUR COMMENTS