कोरोनाया कारणं डोल्पा व धनगढीइ निम्ह सित, सीपिं १३म्ह थ्यन

येँ – कोरोना भाइरसया कारणं डोल्पा व धनगढीइ छम्ह-छम्ह मनू सीगु दु । कार्णाली स्वास्थ्य विज्ञान प्रतिष्ठान जुम्ला व सेती प्रादेशीक अस्पतालय् याःगु परीक्षणय् निम्हेसियां रिपोर्ट पोजेटिभ वःगु खः । थ्व नापं नेपालय् कोरोना संक्रमणया कारणं सीपिनि ल्याः १३म्ह थ्यंगु दु ।

डोल्पाया जगदुल्ला गाँउपालिका वडा नम्बर ३य् च्वम्ह ५८दँ मिजं कोरोना संक्रमणया कारणं सीगु खः । जेठ २१ गते सीम्ह उम्ह मनूूयात दमया ल्वय् दुगु खँ धाःगु दु । दमया ल्वय्या वासः यायेगु निंतिं सुर्खेतय् वनाः जेठ १६ गते डोल्पा लिहांवःगु खः । क्वारेन्टाइनय् हे च्वनाच्वम्ह उम्ह मनू मदयेधुंकाः जेठ २२ गते स्वबा संकलन याःगु खः । कार्णाली स्वास्थ्य विज्ञान प्रतिष्ठान जुम्लाय् याःगु परीक्षणय् उम्ह मनूयात कोरोना जूगु पुष्टि जूगु खः ।

अथेहे धनगढी-४या ५५दँया मिसा डायलासिस यानाच्वंगु इलय् अस्पतालय् मदुगु खः । जेठ २३ गते मुदुम्ह मिसाया पीसीआर परीक्षण याःगु इलय् पोजेटिभ वःगु खः ।