येँय् ट्वाइलेट मालेगु एप्स !

येँ – येँय् सार्वजनिक चःबिया तःधंगु समस्या दु । थाय्थासय् न्हूगु चःबि दयेके धाःसां तत्काल याये फइगु सम्भव मदु । थज्याःगु अवस्थाय् आः विद्यमान निजी चःबितय्त हे लँजुवाःतय् लागिं समेत प्रयोग याकेगु छुं उपाय दइ ला ?थुकिया समाधान लुइकूगु दु ‘एनी टाइम ट्वाइलेट’ नांगु पुचःया निम्ह दुजःतय्सं ।

उमिगु आइडिया खः, यँे दुने च्वंगु रेष्टुरेन्टत मध्ये छगू धलः अज्याःगु दयेकेगु गुपिं चःबि वने हथाय् जूपिं मनूतय्त थःगु रेष्टुरेन्टया चःबि प्रयोग याकेत सहमत जुइ । अले उमिगु नां तयाः छगू एप्स तयार यायेगु । सुं नं मनुखं अज्याःगु एप्स स्वयाः चःबि प्रयोग याकेत तयार जूपिं रेष्टुरेन्टय् वनाः च्व–खि फायेगु ज्या याये फइ ।

यदि अज्याःगु रेष्टुरेन्टतय्गु धलः ताःहाकः जुया वन धाःसा येँय् जक ६००० स्वयां अप्वः ‘सार्वजनिक चःबि’ याये फइ । नापं एप्सय् विज्ञापन तयाः ध्यबा नं आम्दानी याये फइ । येँ मनपा सहरी योजना आयोगं म्हिगः याःगु ‘स्मार्ट सहरी प्रविधि प्रतिस्पर्धा’ य् प्रस्तुत याःगु थ्व न्हूगु योजनां ७ लाख तका सहित न्हाप सिरपाः त्याकूगु दु ।

धेंधेंबल्लाखय् मुक्कं प्यंगू न्हूगु बिचाः बिउपिं प्यंगू पुचः न्हाप लाःगु खःसा थ्व प्यंगू मध्ये नं ‘एनी टाइम ट्वाइलेट’ उत्कृष्ट जूगु खः ।
न्हाप लाःगु फुक्कं पुचःयात प्रधानमन्त्री केपी ओलीं सिरपाः लःल्हानादिल ।

थ्व धेंधेंबल्लाखय् मुक्कं ४५२ गू प्रस्ताव वःगुली १४२ गू दथुइ धेंधेंबल्लाः यानाः २४ गू फाइनलय् वंगु व उकी दुनें थ्व प्यंगूयात न्हापा घोषणा यानागु खँ सहरी योजना आयोगया उपाध्यक्ष सरोज बस्नेतं कनादिल । वंगु खुला न्ह्यवंनिसें न्ह्यानाच्वंगु थ्व धेंधेंबल्लाःया म्हिगः फाइनल ज्याझ्वः कामपा मेयर विद्यासुन्दर शाक्यया सभापतित्वय् जूगु खः ।

सम्बन्धित बुखँ

LEAVE YOUR COMMENTS