असार तक मरु सतःया छतँ दयेके सिधइगु

येँ – तःभुखाचं दुनावंगु येँया ऐतिहासिक मरु सतः वइगु असार तक छगू तल्ला दयेके क्वचायेकेगु कथं तयारी जुयाच्वंगु खँ सीदुगु दु ।
मरु सतः पुनर्निर्माण निर्देशक समितिया शुक्रवाः च्वंगु बैठकं मरु सतः दयेकेगु ज्याय् आः तक जुयाच्वंगु प्रगतिया समिक्षा यानाः चालु आर्थिक दँया अन्त्य तक छगू तला पुनर्निर्माण यायेगु कार्ययोजना दयेकाः न्ह्याः वनेगु निर्णय याःगु खः ।

समितिया संयोजक लिसें प्रदेश नं. ३ या सांसद राजेश शाक्यया अध्यक्षताय् च्वंगु बैठकय् राष्ट्रिय पुनर्निर्माण प्राधिकरणया कार्यकारी अधिकृत सुशील ज्ञवालीं मरु सतःया ज्या योजनावद्ध ढंगं न्ह्याकेत निर्देशन बियादीगु खः । वय्कलं पुनर्निर्माणया ज्यायात गुणस्तरीय दयेकेगु निंतिं निर्माण सामग्री प्रयोगशालाय् परीक्षण याकेत नं सुझाव बियादिल ।

समितिया संयोजक शाक्यं पुनर्निर्माणया ज्या न्ह्याकेत हुनमानध्वाखा प्रहरी कार्यालय दुगु थासय् सिँयागु ज्या यायेगु वर्कशप सञ्चालन जुयाच्वंगु व यँयाः जात्रा क्वचायेवं मेगु वर्कशप चायेकाः ज्या न्ह्याकेगु जानकारी बियादिल । वय्कलं धयादी, ‘पुनर्निर्माणय् छ्यलेगु सामग्री परीक्षण यानाच्वनागु व वइगु न्हि नं संयुक्त राष्ट्र संघीय संगठन युनेस्को व पुरातत्व विभागं क्वःछिनातःगु मापदण्ड कथं परीक्षण याकेगु जुइ ।’

बैठकय् महानगरपालिकां माःगु आर्थिक ग्वाहालि यायेगु बचं बिउगु दुसा पुरातत्व विभागं नं माःगु प्राविधिक ग्वाहालि यायेगु खँ धाःगु दु ।
थ्वहे झ्वलय् यलया ऐतिहासिक भिंद्यःया देगः जीर्णोद्धार यायेगु तयारी नं न्ह्याःगु दु । यल उद्योग वाणिज्य संघया अग्रसरताय् देगः पुनर्निर्माण जुइत्यंगु खः ।

भारतीय सरकारया आर्थिक ग्वाहालिइ नेपाल सरकारं दयेकेगु धकाः सम्झौता जूगु स्वदँ दयेधुंकाः नं ज्या मन्ह्याःगुलिं स्थानीय व्यापारी व टोल सुधार समितिं थःपिंसं हे उगु देगः दयेकेगु कथं चिउताः प्वंकाच्वंगु खः। भारतीय सरकारया ग्वाहालिं देगः दयेकेगु ज्या न्ह्याकेत अझ नं दत्या ई काइगु व उगु इलय् तक थप भौतिक क्षति जुइ फइगु जूगुलिं याकनं हे पुनर्निर्माण यायेगु कथं स्थानीय जनतां तयारी याःगु खः ।

देगः दयेकेगु निंतिं वंगु मंगलवाः क्षमा पुजा यायेगु ज्या क्वचायेधुंकूगु दु । संघया नेतृत्वय् यल महानगरपालिका, मंगः त्वाः सुधार समिति, थीथी जातीय संस्था व थीथी व्यावसायिक समितितय्सं देगः दनेगु निंतिं ग्वाहालि यायेगु बचं बिउगु दु । थ्व देगः दयेकेगु निंतिं ४ करोड ८१ लाख तका तुइगु खँ धाःगु दु ।

सम्बन्धित बुखँ

LEAVE YOUR COMMENTS