येँदेय् स्यंगुली राष्ट्रपति चिन्तित

येँया निर्वाचित सांसदतय्सं राष्ट्रपति नापलाइगु

येँ – राजधानी येँदेय्या स्वरुप व मौलिकता न्हियान्हिथं स्यना वनाच्वंगु व थ्व नगर अस्तव्यस्त जुजुं वनाच्वंगु खँय् राष्ट्रपति विद्यादेवी भण्डारीं चिउताः प्वंकादीगु दु ।म्हिगः वय्कःयात नापलानादीम्ह नेपाली कांग्रेसया सांसद लिसें पुलांम्ह मन्त्री भिमसेनदास प्रधानं थः समक्ष राष्ट्रपति भण्डारीं थ्व चिउताः प्वंकादीगु खँ कनादीगु खः ।

म्हिगः छगू सार्वजनिक ज्याझ्वलय् न्ववासें सांसद प्रधानं राजधानी येँ देय् अस्तव्यस्त जुजुं वनाच्वंगु खँय् चिउताः प्वंकुसें थुकिया लागिं येँनं त्याना वंपिं सकलें सांसदतलिसे च्वनाः सहलह यायेगु इच्छा समेत व्यक्त यानादीगु खँ नं सांसद प्रधानं कनादिल ।राष्ट्रपतिया चिउताःयात थम्हं सकारात्मक रुपं कयागु खँ सांसद प्रधानं ‘नेपालभाषा टाइम्स’ यात कनादिल ।

वय्कलं आः राष्ट्रपति भण्डारीलिसे भदौ ७ गतेपाखें येँनं त्याना वंपिं सकलें सांसदतय्सं नापलाः वनेगु लागिं थम्हं पहल यानाच्वनागु खँ नं कनादिल । आःया पालय् प्रतिनिधिसभाया सांसदत निं नापलाः वनेगु व वयां लिपा आवश्यक जूसा प्रदेश सभाया सांसदत नं नापलाः वनेफुगु खँ नं वय्कलं कनादिल ।

राष्ट्रपति नापलाः वने न्ह्यः येँया स्थानीयवासी सांसदतलिसे निं खँल्हाबल्हा यायेमाःगु खँ नं वय्कलं कनादिल । येँदेय् धमाधम अस्तव्यस्त जुजुं वनाच्वंगु खँय् चिउताः प्वंकुसें राष्ट्रपति भण्डारीं येँ देय्या मौलिकता कायम जुइ कथं थनया कला, संस्कृति व सम्पदाया रक्षा जुयाच्वनेमाःगु बिचाः तयादीगु खँ नं सांसद प्रधानं कनादिल ।येँ देय् अस्तव्यस्त जूगु खँय् स्थानीय जनतां नं ताःई न्ह्यवंनिसें चिउताः प्वंका वयाच्वंगु दु ।

स्वनिगः केन्द्रित यातायात प्राधिकरण
यातायातया सिण्डिकेट प्रणाली चीकेगु नामय् स्वनिगःया यातायात समस्या जक निं समाधान यायेगु कथं सरकारं विधेयक हःगु खँय् यातायात व्यवसायीत तम्वःगु दु । भौतिक योजना तथा यातायात मन्त्रालयं स्वनिगःया यातायातयात व्यवस्थित यायेगु लागिं ‘काठमाडौं उपत्यका सार्वजनिक यातायात प्राधिकरण’ गठन यायेगु विधेयक सदनय् दर्ता याःगु खः ।

यातायात व्यवसायीतय्सं धाःसा देशव्यापी यातायात समस्या समाधान याये फइगु निकाय गठन यायेमाःथाय् स्वनिगःयात जक केन्द्रित याःगुलिं आः झन् अन्यौल ब्वलनीगु ख्याच्वः बिउगु दु ।

सरकारं धाःसा स्वनिगःया यातायात समस्या समाधान जुल धाःसा देय्या बछि यातायात समस्या समाधान जुइगु जुयाः स्वनिगः केन्द्रित कानून हयेत्यनागु दावी याःगु दु । स्वनिगलय् थ्व कानूनं ज्या यात धाःसा देशव्यापी लागू जुइगु कानून हयेगु खँ धाःगु दु ।

सम्बन्धित बुखँ

LEAVE YOUR COMMENTS