कन्हय्निसें स्वनिगलय् सटडाउन मदु
येँ – कन्हय् निसें स्वनिगलय् सटडाउन जुइगु खबरं यानाः स्वनिगःन्यंकं आः हाकनं फुक्कं बन्द जुइगु जुल धयागु हल्ला न्यनाच्वंगु दु । तर सरकारं धाःसा सटडाउन तयेगु बारे छुं नं धाःगु मदु । सनसनीपूर्ण समाचार च्वयेमाःपिं अनलाइन पोर्टल तये कारणं थज्याःगु हल्ला न्यनाच्वंगु खः । सटडाउन धकाः स्वनिगलय् बजाः, सवारी साधन, मनूत वयेवनेगु फुक्कं बन्द जुइगु कथं हल्ला न्यनाच्वंगु दुसां थज्याःगु धाःसा छुं नं कथंया प्रतिबन्ध जुइत्यंगु मदु ।
विशेषतः शुक्रवाः येँ, यल व ख्वप जिल्ला प्रशासन कार्यालयया प्रमुखपिं (सिडिओ)तय् बैठक लिपा थ्व हल्ला न्यनावंगु खः । थ्व बैठकं जिल्ला प्रशासन कार्यालयया ज्या जक अत्यावश्यक बाहेक मेगु फुक्कं दिकेगु धकाः धाःगु खः । येँ जिल्ला प्रशासन कार्यालय व ख्वप जिल्ला प्रशासन कार्यालयं छगू वक्तव्य हे पिकासें सिडिओ कार्यालयया अत्यावश्यक ज्या बाहेक मेगु फुक्क बन्द यायेगु धाःगु खः । तर अनलाइन पोर्टलतय्सं स्वनिगःन्यंकं हे अत्यावश्यक बाहेक फुक्कं बन्द जुइगु कथं समाचार च्वयेवं आः स्वनिगलय् सटडाउन जुइगु जुल, बजाः, गाडी, आवागमन फुक्क बन्द जुइगु जुल धयागु हल्ला न्यनावंगु खः ।
येँया सिडिओ कार्यालयं पिकाःगु वक्तव्यय् शान्ति सुरक्षा सम्बन्धी सेवा, ठाडो निवेदन व उजुरी सम्बन्धी, मुद्दा सम्बन्धी, अत्यावश्यक ज्याया निंतिं सावरी पास बीगु व विपद व्यवस्थापन सम्बन्धी बाहेक मेगु फुक्कं सेवा बन्द यायेगु धयातःगु खः । थ्व कथं कन्हय् आइतवाः साउन २५ गते निसें भदौ ८ गते तक न्हूगु नागरिकता वितरण सम्बन्धी ज्या, नागरिकताया प्रतिलिपि वितरण, हातहतियार दर्ता, नवीकरण, संस्था, पत्रपत्रिका दर्ता व नवीकरण, निजी सुरक्षा कम्पनी नवीकरण, राहदानी वितरण, नाबालिग परिचयपत्र वितरण व मेमेगु अत्यावश्यक मदुगु ज्या दिकेगु धयातःगु दु ।
LEAVE YOUR COMMENTS